Իմունային համակարգն ամրապնդող առավոտյան ըմպելիք

ԵՐԵՎԱՆ, 10 դեկտեմբերի./Նովոստի–Արմենիա/. Բժիշկ–դիետոլոգ, Բրիսթոլում գտնվող Fine Feather Nutrition թերապևտիկ կլինիկայի ղեկավար Հաննա Բրեյը խորհուրդ է տվել այն ըմպելիքը, որը պետք է խմել առավոտյան իմունիտետն ամրապնդելու համար։


«Մեր իմունային համակարգը բավականին բարդ է։ Այն ներառում է մարմնի բազմաթիվ մասիկներ, որոնք աշխատում են համատեղ։ Հարբուխի առաջին նշաններին սպասելու փոխարեն ավելի լավ է ընդունել կանխարգելիչ միջոցներ` օրվա ընթացքում իմունային համակարգն ամուր պահելու, ձանձրացնող ինֆեկցիաները վախի մեջ պահելու համար», – medikforum–ը մեջբերում է բրիտանացի բժշկի խոսքերը։

Բրեյը, որպես առաջին կանխարգելիչ միջոց, խորհուրդ է տալիս առավոտյան խմել գոլ կիտրոնաջուր։

«Կիտրոնաջուրը չինական և այուրվեդական բժշկության հին ավանդույթներից է, քանի որ ընդունված է համարել, որ այն նպաստում է մաքրմանն ու դետոքսիկացիային։ Բացի այդ, դա C վիտամինի ավելացման պարզ միջոց է։ C վիտամինն իմունային համակարգի ամրապնդման առանցքային սննդանյութերից է», – նշել է Բրեյը։

Ընդունված է համարել, որ կիտրոնաջուրը «դրական է ազդում նաև մարսողության վրա»։ Բրեյը պարզաբանել է, որ կիտրոնաջուրը պատրաստում է օրգանիզմը սնունդ ընդունելուն` «խթանելով մարսողական սեկրեցիան»։

Իմունային համակարգն ամրապնդելու ևս մեկ առանցքային միջոցներից են կենդանի բակտերիաներով հավելումները։

«Մարդկանց մեծ մասը գիտի, որ կենդանի բակտերիաներով հավելումները դրական են ազդում մարսողության վրա», – ասել է Բրեյը։

«Սակայն շատերը չեն հասկանում, որ նրանք նաև շատ լավ ամրապնդում են իմունային համակարգը»։

Բրեյն ընդգծել է, որ իմունային համակարգի 70%–ն «աղիների լորձաթաղանթում է, դրան աջակցում են տարբեր բակտերիաներ»։–0–