ԵՐԵՎԱՆ, 9 նոյեմբերի./Նովոստի–Արմենիա/. Բրիտանացի բժիշկ և Առողջապահության ոլորտի անվտանգության գործակալության գլխավոր բժշկական խորհրդատու Սյուզան Հոփքինսն ընդգծել է, որ կորոնավիրուսից մահանում են հիմնականում չպատվաստվածները, բայց նաև նշել է, որ կորոնավիրուսի պատվաստում արած մարդիկ կարող են մահանալ պատվաստման ժամանակ իմունային պատասխանի աստիճանական թուլացման հետևանքով, հաղորդում է ՏԱՍՍ–ը` հղում անելով The Independent–ին։
«Մենք նախկինի պես գրանցում ենք մահեր հիմնականում չպատվաստված բնակչության շրջանում, բայց պատվաստվածների խմբում ևս կան մահեր ավելի հաճախ թուլացած իմունային արձագանքի հետևանքով (որը ստացվել է կորոնավիրուսի դեմ պատվաստման արդյունքում, խմբգր.)», – նշել է Հոփքինսը։
Նրա խոսքով, պատվաստումից հետո մահացու ելքերի մեծ մասը գրանցվում է տարեց մարդկանց շրջանում, հատկապես 70 տարեկանից բարձր, ինչպես նաև բժշկական ցուցումներով խոցելի մարդկանց շրջանում։
Բժիշկը ռիսկի խմբի մարդկանց խորհուրդ է տվել վերապատվաստվել։ The Independent–ը գրում է, որ այդ մարդիկ, ինչպես նաև 50 տարեկանից բարձր անձինք կարող են ստանալ պատվաստանյութի երրորդ դեղաչափը երկրորդ դեղաչափից վեց ամիս անց։
«Եթե մարդիկ չեն պատվաստվում, ապա մեզ սպասվում է երկար և դժվար ձմեռ», – եզրափակել է Հոփքինսը։
Հրատարակությունը նշել է, որ, Առողջապահության ազգային ծառայության տվյալներով, 80 տարեկանից բարձր բրիտանացիների ավելի քան 70%–ը և 50 տարեկանից բարձր քաղաքացիների մոտ 60%–ն արդեն կատարել է լրացուցիչ պատվաստում։
Մեծ Բրիտանիայում կորոնավիրուսի դեմ պատվաստման առաջին դեղաչափը ստացել է մոտ 50,3մլն մարդ (67մլն բնակչության ավելի քան 75%–ը), ամբողջական պատվաստում է անցել ավելի քան 45,8 միլիոնը (68%)։ Լրացուցիչ պատվաստում ստացել է 10,3մլն բրիտանացի։–0–
