ԵՐԵՎԱՆ, 12հունվարի. /Նովոստի- Արմենիա/. Գիտնականները հայտնաբերել են, որ բանանը կարող է ցանկացած հաբից արդյունավետ կանխել որոշ առողջական խնդիրներ, գրում է magicworld.su-ն:
Բանանի օգտագործումը կարևոր նշանակություն ունի մեր առողջության համար: Այն մեզ տալիս է մեծ քանակի վիտամիններ, սպիտակուցներ և այլ սննդարար նյութեր: Բանանը պարունակում է տիամին, ռիբոֆլավին, նիացին և ֆոլաթթու, որն էներգիայի հիմնական աղբյուրն է: Այս պտուղը նաև բջջանյութի հիանալի աղբյուր է, ինչը մեզ ազատում է մի շարք հիվանդություններից:
Եվ այսպես, ի՞նչ օգուտ կարող է տալ մեզ բանանը.
1. Էներգիա
Բանաններն էներգիայի լավ աղբյուր են, հենց այդ պատճառով մարզիկների սննդակարգում միշտ կա բանան՝ էներգիայի պակասը լրացնելու նպատակով:
2. Սթրես
Բանանները բավականին լավ օգնում են սթրեսը հաղթահարելու գործում: Դրանք պարունակում են տրիպտոֆան ամինաթթու, որն օգնում է լավ տրամադրություն պահպանելուն: Բանանները նաև պարունակում են կալիում և մագնիում, որոնք նույնպես պայքարում են սթրեսային վիճակների դեմ:
3. Սիրտ
Բանաններն օգտակար են նաև սիրտ-անոթային համակարգի համար: Դրանք օգնում են պայքարել հիպերտոնիայի դեմ նույն կալիումի հաշվին:
4. Հիշողություն
Բանանն ամեն օր կաթով օգտագործելը բարելավում է հիշողությունը:
5. Անեմիա (սակավարյունություն)
Բանանը երկաթ է պարունակում, և այդ պտուղը սննդակարգում կանոնավոր ներառելու դեպքում հեմոգլոբինի մակարդակը բարձրանում է, այնպես որ այն շատ օգտակար է երկաթի պակասի դեպքում:
6. Հորմոններ
Բանանը կարգավորում է հորմոնալ ֆոնն օրգանիզմում:
7. Հղիություն
Բանանը կարգավորում է շաքարի պարունակությունը հղիների արյան մեջ, ինչը նպաստում է առավոտյան թուլության կանխմանը:
8. Ստամոքս
Բարձր սննդարարության շնորհիվ բանաններն օգնում են վերահսկել ստամոքսահյութի թթվայնությունը: Բժիշկները նշում են, որ բանաններն օգնում են ստամոքսում լորձի շերտի հաստացմանը, ինչը նվազեցնում է խոցի առաջացման ռիսկը:
9. Գլյուկոզայի մակարդակն արյան մեջ
Բանանները պարունակում են B խմբի վիտամիններ, որոնք օգնում են նորմայի սահմաններում պահել գլյուկոզայի մակարդակն արյան մեջ:
10. Բջջանյութ
Բանանները բջջանյութի լավ աղբյուր են: Դրանց օգտագործումը նախաճաշին նվազեցնում է փորկապության հավանականությունը և կարգավորում է աղիների աշխատանքը:–0–
