Թուրքիան աջակցելու է որոշումներին, որոնց կհամաձայնի Ադրբեջանը. Թուրքիայի ԱԳՆ

ԵՐԵՎԱՆ, 10 հոկտեմբերի./Նովոստի-Արմենիա/. Լեռնային Ղարաբաղում կրակի դադարեցումը չի փոխարինի խնդրի վերջնական լուծմանը: Նման հայտարարությամբ է հանդես եկել Թուրքիայի արտաքին գործերի նախարարությունը Հայաստանի և Ադրբեջանի միջև ձեռք բերվա կրակի դադարեցման մասին համաձայնագրի շուրջ, որը ուժի մեջ պետք է մտներ հոկտեմբերի 10-ին 12:00-ին, հաղորդում է ՏԱՍՍ-ը:

«Հայտարարված հաշտությունը կարևոր առաջին քայլն է (իրավիճակի կարգավորման համար), սակայն այն չի փոխարինի վերջնական լուծմանը (խնդրի)»,- նշվում է հաղորդագրության մեջ:

Թուրքական արտգործնախարարությունում հավելել են, որ «Թուրքիան աջակցելու է այն որոշումներին, որոնց կհամաձայնի Ադրբեջանը»:

«Նման ընկալմամբ Թուրքիան կշարունակի աջակցելո Ադրբեջանին ինչպես բանակցությունների սեղանի, այնպես էլ մարտի դաշտում»,- նշվում է հայտարարության մեջ:

Հոկտեմբերի 10–ին ավելի քան 11 ժամ տևած բանակցություններից հետո Ռուսաստանի, Հայաստանի և Ադրբեջանի ԱԳ նախարարները հանդես են եկել հայտարարությամբ, որն ընթերցել է ՌԴ ԱԳ նախարար Սերգեյ Լավրովը։ Հայտարարության մեջ, մասնավորապես, նշվում է. 2020թ. հոկտեմբերի 10-ի ժամը 12:00-ից մարդասիրական նպատակներով հայտարարվում է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար` Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։ Կրակի դադարեցման հստակ պարամետրերը կհամաձայնեցվեն հավելյալ։ Հայաստանի Հանրապետությունը և Ադրբեջանի Հանրապետությունը, ԵԱՀԿ Մինսկի խմբի համանախագահների միջնորդությամբ, կարգավորման հիմնարար սկզբունքների հիման վրա ձեռնամուխ են լինելու առարկայական բանակցությունների` խաղաղ կարգավորմանը շուտափույթ հասնելու նպատակով։ Կողմերը վերահաստատում են բանակցային գործընթացի ձևաչափի անփոփոխությունը:-0-