ԱՊՀ և ԵՄ ինտեգրացիոն նախագծերն իրարամերժ չեն. Լավրով

ԱՊՀ և Եվրամիության շրջանակներում ինտեգրացիոն գործընթացները պետք չէ հակադրել, իսկ դրանք որպես միմյանց բացառող նախագծեր ներկայացնելու փորձերը  զարմանք են առաջացնում Մոսկվայում, հինգշաբթի ՄՄՀՊՀ ուսանողների առջև ելույթ ունենալիս՝ հայտնել է ՌԴ ԱԳՆ ղեկավար Սերգեյ Լավրովը։

«Երբ մեր հարևաններից հրապարակայնորեն պահանջում են կողմնորոշվել՝ Մոսկվայի, թե Բրյուսելի կողմից են, դա կրկին մեզ ձգում է դեպի նախորդ դարի գաղափարական կարծրատիպեր և հակասում է Ռուսաստանի և ԵՄ համատեղ փաստաթղթերին՝ ողջ Եվրոպական տարածության ինտեգրացիոն գործընթացների փոխլրացման վերաբերյալ»,- ասել է Լավրովը, հաղորդում է ՌԻԱ Նովոստին։

Ըստ նրա, «աշխարհի տարբեր տարածաշրջաններում ինտեգրացիոն գործընթացների զարգացումը տեղի է ունենում նույն սկզբունքների հիման վրա, այսինքն՝ կապիտալների, ապրանքների, ծառայությունների և աշխատուժի ազատ տեղաշարժում»։

«Այդ պատճառով մեզ մոտ, իհարկե, զարմանք են առաջացնում ԱՊՀ երկրների և Եվրամիության ինտեգրացիոն ծրագրերը որպես միմյանց բացառող նախագծեր ներկայացնելու փորձերը»,- ընդգծել է նա։
Ներկայում Եվրամիությունն իր մեջ ներառում է Եվրոպայի 27 պետություններ։ ԵՄ անդամագրվելու թեկնածու են նաև Իսլանդիան, Մակեդոնիան, Թուրքիան, Խորվաթիան, Չեռնոգորիան։
ԱՊՀ մասնակից պետություններն են Ադրբեջանը, Ուզբեկստանը, Թուրքմենստանը, Տաջիկստանը, Ռուսաստանը, Մոլդովան, Ղրղըզստանը, Ղազախստանը, Բելառուսը, Հայաստանը և  Ուկրաինան։ -0-