Ադրբեջանի խորհրդարանին առաջարկում են քննարկել հայ-թուրքական արձանագրությունները

Ադրբեջանի ժողովրդական-սոցիալիստական կուսակցությունը երկրի խորհրդարան առաջարկություն է ներկայացրել Հայաստանի և Թուրքիայի միջև հարաբերությունների հաստատման մասին արձանագրությունների ստորագրման կապակցությամբ քննարկումներ անցկացնելու մասին, հաղորդում են ադրբեջանական ԶԼՄ-ները:

Կուսակցությունն առաջարկում է քննարկումներ անցկացնել երկրի խորհրդարանում՝ ընդհուպ մինչև Թուրքիայի օրենսդիր մարմնում արձանագրությունների վավերացումը:

Ինչպես հայտարարել է Ադրբեջանի ժողովրդական-սոցիալիստական կուսակցության նախագահ Ռովշան Հուսեյնովը, կուսակցությունն առաջարկում է նաև ժամանակավորապես ետ կանչել Թուրքիայում Ադրբեջանի դեսպանին և վերանայել Անկարայի մասնակցությամբ միջազգային նախագծերում երկրի մասնակցությունը:

Հուսեյնովի կարծիքով՝ արձանագրությունների ստորագրոմը ձեռնտու չէր ոչ Ադրբեջանին, ոչ Հայաստանին, որը նման կերպ կորցրել այնպիսի դաշնակցի, ինչպիսին Ռուսաստանն է: Նման իրավիճակում, ինչպես նա նշել է, հաղթել է միայն Թուրքիան:

Հիշեցնենք, որ հոկտեմբերի 10-ին Հայաստանի և Թուրքիայի արտգործնախարարներ էդվարդ Նալբանդյանն ու Ահմեդ Դավութօղլուն Ցյուրիխում ստորագրել են «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Փաստաթղթերն ուժի մեջ են մտնում երկու երկրների խորհրդարանների կողմից դրանց վավերացումից հետո:-0-