Թուրք փորձագետը կասկածում է կարճ ժամկետում խորհրդարանում հայ-թուրքական հարաբերությունների արձանագրությունների վավերացմանը

Թուրք փորձագետ, Եվրոպական կայունության նախաձեռնության (European Stability Initiative) գլխավոր վերլուծաբան Նիգար Գեկսելը կարծում է, որ չարժե ակնկալել հայ-թուրքական հարաբերությունների արձանագրությունների վավերացման հարցի լուծումը Թուրքիայի խորհրդարանում շատ կարճ ժամեկտում։

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից։

«Սա բարդ հարց է։ Կարծում եմ, որ արձանագրություններն անմիջապես չեն դնի քվեարկության՝ մի կողմից հետևելով ղարաբաղյան խնդրի գործընթացներին, մյուս կողմից էական կլինեն այնպիսի կարևոր մասնակիցների քայլերը, ինչպիսիք են ԱՄՆ-ն և Ռուսաստանը»,- ասաց Գեկսելը «Նովոստի-Արմենիա» գործակալությանը տված հարցազրույցում։

«Ի վերջո, այդ քայլը կարվի, բայց եթե մենք այն սպասում ենք շատ կարճ ժամկետում, ապա կհիասթափվենք»,- ասաց նա։

Խոսելով բուն արձանագրությունների մասին՝ Գեկսելը նշեց, որ դրանցում պահպանվել է հավասարակշռությունը այն մասում, որտեղ հնարավոր է, իսկ այն մասում, որտեղ հնարավոր չէ, անորոշություն է մտցված՝ չանցնելու համար «կարմիր գիծը» երկու երկրների միջև։

Հայաստանի և Թուրքիայի սահմանը փակ է 1993-ից՝ պաշտոնական Անկարայի նախաձեռնությամբ։ Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։

Հայաստանի և Թուրքիայի նախագահները Բուրսայի «Աթաթուրք» մարզադաշտում նախօրեին դիտել են աշխարհի 2010թ. առաջնության ընտրական փուլի խաղը, որն ավարտվեց 2։0 հաշվով՝ հօգուտ թուրքերի։

Թուրքիա-Հայաստան խաղից հետո Հայաստանի արտգործնախարար Էդվարդ Նալբանդյանը հայ լրագրողներին Բուրսայում հայտարարեց, որ «հայ-թուրքական արձանագրությունները կբացեն այն փակ դուռը, որը երկար տարիներ բաժանում էր երկու ժողովուրդներին և հնարավորություն կտան հիմքեր ստեղծել երկու երկրների միջև հարաբերությունների զարգացման համար»։ --0--