Լավրովն ու ԵՄ դիվանագիտության ղեկավարը Լեռնային Ղարաբաղում կրակի անհապաղ և լիակատար դադարեցման կոչ են արել

ԵՐԵՎԱՆ, 1 հոկտեմբերի./Նովոստի-Արմենիա/. Ռուսաստանի ԱԳ նախարար Սերգեյ Լավրովը և ԵՄ դիվանագետ Ժոզեպ Բորելը չորեքշաբթի օրը կայացած հեռախոսազրույցի ընթացքում ընդգծել են ԼՂ հակամարտության գոտում կրակի անհապաղ և լիակատար դադարեցման անհրաժեշտությունը, և բոլոր երկրներին կոչ արել առավելագույն զսպվածություն ցուցաբերել, հաղորդում է ՏԱՍՍ-ը: 

«Քննարկվել է իրավիճակը Լեռնային Ղարաբաղի հակամարտության գոտում: Ընդգծվել է անհապաղ և լիակատար հրադադարի անհրաժեշտությունը, հակամարտության կողմերի և այլ երկրների կողմից առավելագույն զսպվածության դրսևորումը», - մեջբերում է ՏԱՍՍ-ը ՝ հղում անելով ՌԴ ԱԳՆ հաղորդագրությանը:

Ինչպես նշում են նախարարությունում, կողմերը աջակցություն են հայտնել ԵԱՀԿ Մինսկի խմբի համանախագահների՝ այս տարվա սեպտեմբերի 27-ի հատուկ հայտարարությանը` հակամարտող կողմերին կոչ անելով դադարեցնել հետագա սրացումը:

«Այս տարվա սեպտեմբերի 29-ին ՄԱԿ-ի Անվտանգության խորհրդի և ԵԱՀԿ Մշտական ​​խորհրդի հատուկ նիստերի քննարկումներին համընթաց շեշտվել է ԵԱՀԿ Մինսկի խմբի համանախագահների կենտրոնական դերը Լեռնային Ղարաբաղի կարգավորման բանակցային գործընթացում», - եզրափակել է դիվանագիտական ​​գերատեսչությունը:

Արցախում իրավիճակի սրացման մասին

Սեպտեմբերի 27–ին ժամը 07։10–ին Ադրբեջանի ԶՈւ–ն լայնածավալ գործողություններ է սկսել Արցախի շփման գծի ողջ երկայնքով։ Հայաստանի և Արցախի ՊՆ–ների հաղորդմամբ, հակառակորդը սկսել է օդային և հրթիռային հարձակումներ, սակայն հետ է ամղվել մի քանի ուղղություններով։
Ադրբեջանական կողմը կրել է կենդանի ուժի մեծաքանակ կորուստներ, կորցրել է նաև մեծ քանակի տեխնիկա

Արցախի և Հայաստանի ՊՆ–ների հաղորդմամբ, հայկական կողմից զոհվել է 103 զինծառայող։ Վիրավորվել է մոտ 200 զինծառայող։

Նշենք, որ Ադրբեջանի ԶՈւ–ն գնդակոծում է նաև խաղաղ բնակավայրերը, այդ թվում` Արցախի մայրաքաղաք Ստեփանակերտը։

Արցախում և Հայաստանում հայտարարվել է ռազմական դրություն և համընդհանուր զորահավաք։–0–