ԵՐԵՎԱՆ, 1 նոյեմբերի. /Նովոստի-Արմենիա/. Երեքշաբթի Երևանում ՀՀ արտգործնախարար Էդվարդ Նալբանդյանը Հնդկաստանի Արևելքի հարցերով քարտուղար Սանջայ Սինգհի հետ քննարկել է հայ-հնդկական համագործակցության ընդլայնման հարցերը:
«Ողջունելով հյուրին` նախարար Նալբանդյանը բարձր գնահատեց վերջին շրջանում հայ-հնդկական հարաբերություններում նկատվող ակնհայտ աշխուժացումը՝ ընդգծելով, որ դա երկու կողմից ցուցաբերվող հետևողականության արդյունք է»,- ասվում է արտաքին քաղաքական գերատեսչության մամուլի ծառայության հաղորդագրության մեջ:
ՀՀ ԱԳՆ ղեկավարն ընդգծել է, որ Երևանը շահագրգռված է հայ-հնդկական ավանդական ջերմ ու բարեկամական հարաբերությունների հետագա զարգացմամբ և խորացմամբ։
Սանջայ Սինգհն իր կողմից ընդգծել է, որ Հնդկաստանում առանձնահատուկ ջերմությամբ են վերաբերվում Հայաստանին ու հայ ժողովրդին, և երկրի իշխանությունները նպատակադրված են ընդլայնել Հայաստանի հետ բարեկամական գործընկերությունն ու համագործակցությունը։
Զրուցակիցները գոհունակությամբ արձանագրեցին, որ անցյալ տարի ՀՀ ԱԳ նախարարի Հնդկաստան կատարած պաշտոնական այցելության ընթացքում ձեռք բերված պայմանավորվածություններն արդեն ի կատար են ածվում:
Էդվարդ Նալբանդյանն ու Սանջայ Սինգհը քննարկեցին հոկտեմբերի 31-ին կայացած տնտեսական համագործակցության միջկառավարական հանձնաժողովի նիստի և այսօր տեղի ունեցած երկու երկրների ԱԳՆ-երի միջև խորհրդատվությունների արդյունքները:
Հանդիպմանը կողմերն անդրադարձան երկկողմ քաղաքական, տնտեսական, կրթության, տեղեկատվական տեխնոլոգիաների, մշակութային և առողջապահության բնագավառներում համագործակցության ընդլայնմանն ուղղված ծրագրերին և այդ ուղղությամբ ձեռնարկվելիք քայլերին` մասնավորապես համապատասխան գերատեսչությունների միջև խորհրդատվությունների անցկացման, գործարար շրջանակների միջև շփումների ակտիվացման ինչպես նաև իրավապայմանագրային դաշտի ընդլայնման միջոցով:
Զրուցակիցները մտքեր փոխանակեցին տարածաշրջանային և միջազգային մի շարք հարցերի շուրջ:
ՀՀ ԱԳՆ ղեկավարը ներկայացրել է Հարավային Կովկասի տարածաշրջանային խնդիրները և դրանց կարգավորման վերաբերյալ Հայաստանի դիրքորոշումները: Էդվարդ Նալբանդյանը բարձր գնահատեց Հնդկաստանի հավասարակշռված դիրքորոշումն արցախյան հիմնախնդրի վերաբերյալ: -0-
