ՀՀ Կոտայքի մարզում ՃՏՊ-ի հետևանքով երեք մարդ է զոհվել, երեքը վիրավոր է

ՀՀ Կոտայքի մարզի Աբովյան-Գողթ ավտոճանապարհին ՃՏՊ-ի հետևանքով երեք մարդ է զոհվել, այդ թվում 13 տարեկան երեխա, և կա երեք վիրավոր, հաղորդում է հանրապետության Փրկարար ծառայությունը։

Միջադեպը տեղի է ունեցել նախօրեին ուշ երեկոյան։ Դեռևս չբացահայտված հանգամանքներում բախվել են «ՎԱԶ-2121» և «ԳԱԶ-69»  մակնիշի ավտոմեքենաները, ինչից տեղի է ունեցել հրդեհի բռնկում:

ՃՏՊ-ի հետևանքով տեղում զոհվել են «ՎԱԶ-2121» ավտոմեքենայի վարորդ, 49-ամյա Աշոտ Հայրապետյանը և ուղևոր 49-ամյա Զինա Հայրապետյանը, ինչպես նաև «ԳԱԶ-69» մակնիշի ավտոմեքենայի ուղևոր 13-ամյա Առաքել Գևորգյանը։

Մյուս ուղևորները` 37-ամյա Գառնիկ Գրիգորյանը, 25-ամյա Հենրիկ Հայրապետյանը և 30-ամյա  Լեռնիկ Հայրապետյանը մինչև հրշեջ-փրկարարների կանչի վայր հասնելը, տեղի ուժերով դուրս են բերվել ավտոմեքենաներից և շտապօգնության ավտոմեքենայով տեղափոխվել Երևան քաղաքի «Գրիգոր Լուսավորիչ» բժշկական կենտրոն: Բոլոր տուժածները Գողթ գյուղի բնակիչներ են:

Ավտոմեքենաներն այրվել են ամբողջությամբ:

Լեռնիկ Հայրապետյանի առողջական վիճակը բավարար է, իսկ Հեհնրիկ Հայրապետյանինը և Գառնիկ Գրիգորյանինը` ծանր: -0-