«Ռուսական արջուկ» մրցույթ-խաղը կանցկացվի հայկական դպրոցներում նոյեմբերի 11-ին

ԵՐԵՎԱՆ, 11 նոյեմբերի. /Նովոստի-Արմենիա/. «Ռուսական արջուկ. լեզվաբանություն բոլորի համար» մրցույթ-խաղը կանցկացվի նոյեմբերի 11-ին Երևանի և Գյումրիի (Շիրակի մարզ) քաղաքների 49 դպրոցում, «Նովոստի-Արմենիա» գործակալությանը հայտնեցին «Այբ» կրթական հիմնադրամից։

Մրցույթին կմասնակցեն Երևանի և Գյումրու գյուղական 42 դպրոցների 2-11-րդ դասարանների ավելի քան 2 հազար աշակերտներ։ Դրանց թվում են Ռուսաստանի պաշտպանության նախարարության 21-րդ միջնակարգ դպրոցը, որտեղ սովորում են Գյումրիում տեղակայված ռուսական ռազմակայանի զինծառայողների երեխաները։

«Ռուսական արջուկ. լեզվաբանություն բոլորի համար» մրցույթ-խաղի հիմնական նպատակը ռուսաց լեզվի նկատմամբ հետաքրքրության զարգացումն է նրա ողջ հմայքի և հարստության ցուցադրման միջոցով։

Մրցույթին մասնակցելու հրավեր են ստացել ոչ միայն Երևանի և Գյումրու կրթական հաստատությունները, որոնք ռուսական դասարաններ ունեն, այլ նաև այդ երկու քաղաքների այլ դպրոցներ։

«Դպրոցականների նմանատիպ ակտիվությունը հերթական անգամ վկայում է ուսման նկատմամբ նրանց հետաքրքրության, ինչպես նաև այն մասին, որ հայկական դպրոցներն ամեն տարի սիրով և ոգեշնչվածությամբ են մասնակցում տարբեր առարկաների զանազան մրցույթների»,- նշվում է հաղորդագրության մեջ։

2009 թվականի նոյեմբերին «Այբ» կրթական հիմնադրամը «Ռուսական արջուկ» մրցույթ է կազմակերպել Երևանի չորս դպրոցներում, որին մասնակցել է 262 դպրոցական։

Առաջին անգամ մրցույթն անցկացվել է Ռուսաստանում 2000 թվականին 64 հազար դպրոցականների մասնակցությամբ։ Մրցույթի նկատմամբ հետաքրքրությունն աճում է տարեցտարի, ընդլայնվում է մասնակից պետությունների աշխարհագրությունը։ 2009 թվականին «Ռուսական արջուկ» մրցույթին մասնակցել է 2,5 միլիոն երեխա Ղազախստանից, Ուկրաինայից, Լատվիայից, Մոլդովայից, Ղրղզստանից, Ուզբեկստանից, Իսրայելից, ԱՄՆ-ից, ԱՄԷ-ից և մի շարք այլ երկրներից։ -0-