Ընդհանուր սահմանների բացակայության պատճառով Հայաստանի մուտքը Մաքսային միություն արդյունավետ չէ. վարչապետ

Հայաստանի վարչապետ Տիգրան Սարգսյանը կարծում է, որ Ռուսաստանի, Բելառուսի և Ղազախստանի Մաքսային միություն հանրապետության մուտքն արդյունավետ չէ՝ այդ երկրների հետ ընդհանուր սահմանների բացակայության պատճառով։

«Եթե Ռուսաստանի, Բելառուսի և Ղազախստանի տնտեսությունների միջև ինտեգրացիոն գործընթացներ են կատարվում, ապա բնական է, որ անհրաժեշտ է առավել բարենպաստ միջավայր ստեղծել բիզնեսի համար, իսկ ամենալավ միջավայրը մաքսային պատնեշների բացակայությունն է և միասնական տնտեսական տարածքում գործելը։ Սա շատ է հեշտացնում գործունեությունը, առևտրային հասքերն ավելի հեշտ են  անցնում երկրների միջև սահմանները, և ընդհանրապես  երկրների միջև ինտեգրացիա է խթանվում»,- ռուսական ԶԼՄ-ների ներկայացուցիչների հետ հանդիպման ժամանակ ասաց Սարգսյանը։

Ինչ վերաբերում է մաքսային միությունում հայկական մասնակցությանը, ապա ըստ վարչապետի՝ համաշխարհային փորձն է ուսումնասիրվել։

«Համաշխարհային պրակտիկայում նման նախադեպ չկա, որպեսզի ընդհանուր սահման չունեցող երկիրը Մաքսային միությունում լինի։ Այսինքն՝ Մաքսային միությունն այդ տեսանկյունից անիմաստ է դառնում, քանի որ եթե պետք է անընդհատ ապրանքների մաքսային ձևակերպում իրականացնել՝ անցնելով երրորդ երկրով, ապա մաքսային միության իմաստն ու արդյունավետությունը կորչում է»,- ասաց կառավարության ղեկավարը։

Ըստ նրա՝ այստեղ անհրաժեշտ է այլ մոդուս գտնել՝ ինչպես իրականացնել ինտեգրացիոն գործընթացները՝ միասնական Մաքսային միություն չմտնելով։ -0-