Հայաստանի սփյուռքի նախարարության 23 աշխատակից երեքշաբթի երդվեցին քաղաքացիական ծառայության անցնելու կապակցությամբ։
Ինչպես նշեց Սփյուռքի նախարար Հրանուշ Հակոբյանն արարողության ընթացքում, քաղաքացիական ծառայությունը յուրահատուկ ծառայություն է հայկական պետությանը և հայ ժողովրդին։
«Ձեզ վրա ավելի մեծ պատասխանատվություն է դրված, քանի որ դուք ծառայում եք ոչ միայն Հայաստանի քաղաքացիներին, այլև մեր հայրենակիցներին ողջ աշխարհում։ Սա շատ բարդ աշխատանք է»,- ասաց Հրանուշ Հակոբյանը։
Նրա խոսքերով՝ քաղաքացիական ծառայողը պետք է երեք կարևորագույն որակներով օժտված լինի՝ ազնվությամբ, պատասխանատվությամբ և աշխատասիրությամբ։
«Մենք բոլորս դեռ երիտասարդ ենք, մի ամբողջ կյանք ունենք առջևում, և լավ աշխատող դառնալու համար, նախևառաջ, պետք է լավ մարդ լինել»,- ընդգծեց Հակոբյանը։
Հայաստանի Քաղծառայության խորհրդի ղեկավար Մանվել Բադալյանն իր հերթին ընդգծեց, որ առանց որակյալ քաղաքացիական ծառայողների անհնար է որակյալ պետական համակարգի կայացումը։
«Քաղաքական ուժերի բաշխումից անկախ՝ դուք պետք է ծառայեք ձեր պետությանը և ժողովրդին, դա խնդիրների լուծման միակ ուղին է»,- ասաց նա։ -0-
