Կատարողական արվեստի միջազգային ութերորդ փառատոնը կանցկացվի հոկտեմբերի 1-8-ը ՀՀ մայրաքաղաքում, ուրբաթ լրագրողներին հայտնեց High Fest - 2010 փառատոնի նախագահ Արթուր Ղուկասյանը։
«High Fest միջազգային փառատոնը բազմաժանր միջոցառում է, որին մասնակցում են այն ստեղծագործական կոլեկտիվներն ու թատրոնների դերասանները, ովքեր աշխատում են կատարողական արվեստի բոլոր ժանրերում՝ դրամա, հումոր, մնջախաղ, շարժում, կրկես, փողոցային թատրոն, տիկնիկային թատրոն, պար, երաժշտություն»,- ասաց նա։
Ըստ Ղուկասյանի, այս տարի իրենց վարպետությունը ցույց կտան 22 երկրի 250 մասնակիցներ։ Մայրաքաղաքի թատերական բեմերում շուրջ 60 ներկայացում կցուցադրվի։ Փառատոնի մասնակիցներից են Ռուսաստանի, Ավստրալիայի, Սլովենիայի, Չեխիայի, Մեծ Բրիտանիայի, ԱՄՆ-ի Վրաստանի թատերախմբերը։ Առաջին անգամ փառատոնին կմասնակցեն Չինաստանի և Ուկրաինայի թատերական կոլեկտիվները։
Փառատոնի նպատակների մասին խոսելիս՝ Ղուկասյանը նշեց, որ High Fest-ը նոր անուններ բացահայտելու, Հայաստանում թատերական արվեստը զարգացնելու և արտասահմանյան հանդիսատեսի դատին հայկական կատարողական արվեստը ներկայացնելու նպատակ ունի։
Ըստ նրա, փառատոնին մասնակցելու համար հրավիրվում են փորձարարական թատերախմբեր, ուսանողական կոլեկտիվներ, ովքեր հայտնի չեն հայ հանդիսատեսին, բայց շատ հետաքրքիր են նորարարական արվեստի առումով։
«Հրավիրվում են այնպիսի թատրոններ, որոնք տաղանդավոր երիտասարդ դերասանների և ռեժիսորների համար կատալիզատոր են՝ ոչ միայն Հայաստանից, այլ նաև փառատոնի այլ մասնակից երկրներից»,- ասաց Ղուկասյանը։
Նա նաև տեղեկացրեց, որ այս տարի փառատոնը կբացվի «Made in Iran» ներկայացումով՝ «Էմրուզ» իրանական թատրոնի բեմադրությամբ, որը տեղի կունենա Ստանիսլավկսու անվան պետական ռուսական դրամատիկական թատրոնում։
«Մեզ համար իրանական թատերարվեստը հետաքրքրություն է ներկայացնում, քանի որ տարեցտարի իրանական թատրոնը լավագույն արդյունքներն է ցուցադրում և ամբողջովին եվրոպական ոգով է տոգորված։ Այդ պատճառով High Fest 2010 փառատոնի ժամանակ այն առանձին ծրագրով կներկայանա»,- ասաց High Fest փառատոնի նախագահը։ -0-
