Հայաստանի կառավարությունը 33,6 հազար դոլար է հատկացրել Ռուսաստանից հացահատիկի և ձեթի ներկրմանը

ԵՐԵՎԱՆ, 24 սեպտեմբերի. /Նովոստի-Արմենիա/. Հայաստանի կառավարությունն ուրբաթ տեղի ունեցած նիստում ավելի քան 12,2 մլն դրամ (33,6 հազար դոլար) է հատկացրել Ռուսաստանից որպես մարդասիրական օգնություն 5 հազար տոննա պարենային հացահատիկի և հազար տոննա արևածաղկի ձեթի ներկրմանն ու պահեստավորմանը։

Ինչպես տեղեկացրեց արտակարգ իրավիճակների նախարար Արմեն Երիցյանը, ներկայումս մոտ 450 տոննա ձեթ արդեն ներկրվել է Հայաստան, մնացած մասն ակնկալվում է ստանալ մեկ շաբաթվա ընթացքում։

«Այնուհետև կսկսվի հացահատիկի ներկրումն ու պահեստավորումը։ Տրանսպորտային և պահեստավորման բոլոր ծախսերը կմարվեն Հայաստանի ԱԻՆ Պետպահուստների գործակալության արտաբյուջետային միջոցների հաշվին»,- նշեց նախարարը։

Ռուսաստանը 2010 թվականի ապրիլին որոշում է ընդունել Հայաստանին որպես մարդասիրական օգնություն 5 հազար տոննա հացահատիկ և հազար տոննա արևածաղկի ձեթ հատկացնելու վերաբերյալ։ -0-