«Երգում է 70-ականների Երևանը» համերգային ծրագիրը կներկայացվի լոսանջելեսյան հանդիսատեսին դեկտեմբերին, հինգշաբթի լրագրողներին հայտնեց նախագծի հեղինակ, ջազմեն, բասկիտառահար Վազգեն Ասատրյանը։
«Համերգների նպատակը ոչ թե գումար վաստակելն է, այլ ելույթ ունենալու հնարավորություն տալն այն կատարողներին, ովքեր հանդես չեն եկել արդեն 20-30 տարի, ինչպես նաև հիշեցնել երիտասարդությանը, որ եղել են այսպիսի հրաշալի արտիստներ, եղել են այսպիսի երգեր»,- հինգշաբթի ասաց նա «Նովոստի» միջազգային մամուլի կենտրոնում։
Ասատրյանն ասաց նաև, որ «Երգում է 70-ականների Երևանը» համերգային ծրագրի շրջանակներում երկու համերգ կանցկացվի Հայաստանի մայրաքաղաքում՝ սեպտեմբերի 25-ին և 26-ին։
«Երգում է 70-ականների Երևանը» առաջին համերգները կայացել են 2005 թվականին Երևանում և մեծ հաջողությունն են վայելել հանդիսատեսի մոտ, ով գալիս էր համերգի ոչ միայն կարոտի զգացումով, այլ նաև որակյալ երաժշտություն լսելու համար։
Ինչպես հայտնեց հայտնի երաժիշտը, այս տարի նոր ծրագիր կլինի 70-ականների հայ աստղերի մասնակցությամբ։ Նրանց թվում են Լևոն Սևանը, Ռայիսա Մկրտչյանը, Ռուբեն Մաթևոսյանը, Երվանդ Երզնկյանը, Սյուզան Մարգարյանը և ուրիշներ։
Կհնչեն երգեր, որոնք չեն կատարվել նախորդ ծրագրում, ինչպես նաև հանդիսատեսը կլսի նախկինում հանրաճանաչ երգչուհի Էլվինա Մակարյանի երգը Սյուզան Մարգարյանի կատարմամբ։
Համերգային ծրագրի գլխավոր հովանավորն է VivaCell ընկերությունը և ՎՏԲ Հայաստան Բանկը որպես հովանավոր-գործընկեր։ Հովանավորների թվում է նաև Ինգո-Արմենիա ընկերությունը։
Խոսելով երգարվեստի ներկա վիճակի մասին՝ Ասատրյանը նշեց, որ Հայաստանը բավական տաղանդավոր երիտասարդություն ունի, որը, սակայն, աջակցության կարիք է զգում։
«Երգում է 70-ականների Երևանը» համերգային ծրագիրը միաժամանակ հիշեցում և պայքար է, պայքար անորակ երաժշտության դեմ»,- հավելեց ջազմենը։ -0-
