Դեմոկրատ-կոնգրեսական Ռոն Քլեյնն աջակցել է Հայոց ցեղասպանության բանաձևի ընդունմանը

Ամերիկացի դեմոկրատ-կոնգրեսական Ռոն Քլեյնն աջակցում է ԱՄՆ Կոնգրեսի կողմից Օսմանյան կայսրությունում 1915 թ.-ին տեղի ունեցած Հայոց ցեղասպանության բանաձևի ընդունմանը, հաղորդում է Ամերիկայի հայկական համագումարը (ԱՀՀ):

ԱՄՆ Կոնգրեսի արտաքին հարաբերությունների կոմիտեի կողմից հավանության արժանացած թիվ 252 բանաձևին արդեն աջակցում է Հանրապետական և Դեմոկրատական կուսակցությունները ներկայացնող 143 կոնգրեսական:

«Ամերիկան պետք է օրինակ ծառայի և դատապարտի ցանկացած ցեղասպանություն, որտեղ էլ և երբ էլ այն եղած լինի», - մեջբերում է Քլեյնի խոսքերը ԱՀՀ-ն:

«Ես շատ եմ ցանկանում միանալ հայ-ամերիկյան միությանը և բոլոր ամերիկացիներին, ովքեր դեմ են անիմաստ բռնություններին և ցեղասպանություններին», - ավելացրել է նա:

Տեղեկատվության համաձայն, կոնգրեսականը բանաձևի հետ կապված հարցերը քննարկել է Ֆլորիդայի հայ-ամերիկյան գործողության կոմիտեի անդամների հետ:

1972 թ.-ին հիմնադրված Ամերիկայի հայկական համագումարը խոշորագույն համազգային կազմակերպություններից մեկն է, որը զբաղվում է Հայաստանի և հայության խնդիրների վերաբերյալ հասարակական իրազեկվածության հետ կապված հարցերով:-0-