Հայ ճարտարապետներն իրենց նախագծերն են ներկայացրել Վենետիկում անցկացված ճարտարապետության 12-րդ միջազգային փառատոնում

ԵՐԵՎԱՆ, 15 սեպտեմբերի. /Նովոստի-Արմենիա/. Հայ ճարտարապետներն իրենց նախագծերն են ներկայացրել Վենետիկում՝ ճարտարապետության 12-րդ միջազգային փառատոնում, որն անցկացվում էր օգոստոսի 29-ից նոյեմբերի 21-ը, չորեքշաբթի լրագրողներին ասաց Հայաստանի քաղաքաշինության նախարարության Ճարտարապետության ազգային թանգարան-ինստիտուտի տնօրեն Աշոտ Գրիգորյանը։

Ճարտարապետության վենետիկյան փառատոնն աշխարհի ամենահեղինակավորներից է և 1980 թվականից անցկացվում է որպես Վենետիկի բիենալեի մի մաս։

«Հայաստանի մասնակցությունը փառատոնին ինքնանպատակ չի եղել։ Հայաստանը չէր հավակնում գլխավոր մրցանակի, մեզ համար կարևոր էր ամբողջ աշխարհին ցույց տալ մեր նվաճումները և ապացուցել, որ Հայաստանը մի երկիր է, որն ունի սեփական ճարտարապետություն»,- ասաց Գրիգորյանը։

Ներկայիս «Մարդիկ հանդիպում են ճարտարապետության մեջ» կարգախոսով անցկացվող փառատոնը մասնակիցներ էր հավաքել աշխարհի ավելի քան 50 երկրներից: Բացի այդ, այս տարի առաջին անգամ հաջողվել է միաբանել հայ ճարտարապետների։ աշխարհի տարբեր ծայրերից՝ Քաթարից, ԱՄՆ-ից, Թուրքիայից և Իտալիայից:

Վենետիկի «Մուրադ Ռաֆայելյան» գիմնազիայի շենքում տեղակայված հայկական տաղավարը ներկայացրել է մասնակիցների երեք խումբ։ Այսպես, Նարեկ Սարգսյանի արհեստանոցը ներկայացրել է նախագծային էսքիզներ և Երևանում Շարլ Ազնավուրի տուն-թանգարանի մակետը։ Գարեգին Եղոյանի արհեստանոցը՝ ACBA Credit Agricole-ի շենքի նախագծման պատմությունը Գյումրիի գլխավոր հրապարակում, ինչպես նաև այդ հրապարակի մակետը։ Երրորդ աշխատանքը, որի հեղինակը Ճարտարապետության թանգարան-ինստիտուտի տնօրեն Աշոտ Գրիգորյանն է, արտացոլել է Հայկական լեռնաշխարհը՝ որպես հայկական ճարտարապետական մտքի ելակետ։

Գրիգորյանը նշեց, որ հայկական տաղավարն արժանացել է Վենետո վարչական շրջանի մրցանակի՝ ճարտարապետական արվեստի միջոցով հայ-իտալական մշակութային կապերի զարգացման գործում ունեցած ավանդի համար։

«Մեր աշխատանքները կոչ են անում կառուցել ապագան՝ հիմնվելով ավանդական ճարտարապետական դպրոցի վրա»,- նշեց Գրիգորյանը։

Հայաստանն առաջին անգամ մասնակցել է փառատոնին 1996 թվականին։ -0-