Հայաստանի առողջապահության նախարարությունը պաշտոնապես հայտարարում է, որ Վրաստանում Արևմտյան Նեղոսի տենդի դեպքեր չեն արձանագրվել և կասկածներ նույնպես չկան, չորեքշաբթի «Նովոստի-Արմենիա» գործակալությանը հայտնեցին նախարարության մամուլի ծառայությունից։
Արևմտյան Նեղոսի տենդը մոծակներից փոխանցվող վիրուսային հիվանդություն է։ Այն բնութագրվում է ուղեղի թաղանթի բորբոքումով, լորձաթաղանթների համակարգային ախտահարումով և լիմֆադենոպատիայիով (ավշային հանգույցների մեծացում)։
«Միաժամանակ հիվանդության անվանումը հիմք չէ ենթադրելու, որ Արևմտյան Նեղոսի տենդը Հայաստան է ներթափանցում Եգիպտոսից աշնանային սեզոնից հետո երկիր վերադարձող քաղաքացիների հետ»,- ասվում է մամուլի ծառայության հաղորդագրությունում։
ՀՀ առողջապահության նախարարության կողմից իրականցվում են մի շարք կանխարգելիչ միջոցառումներ, քանի որ ոչ մի երկիր ապահովագրված չէ վարակի ներթափանցումից, հատկապես, եթե երկրի բնակլիմայական պայմանները նպաստավոր են հիվանդության փոխանցողների կենսագործունեության համար:
Մասնավորապես, երկրում իրականացվում են միջատաբանական հետազոտություններ, միջատազերծման և ջրականգերի կրճատման աշխատանքներ, բնակչության շրջանում քարոզչություն։
Բացի այդ, ուժեղացվել է հսկողությունը Արևմտյան Նեղոսի տենդի բռնկումներ արձանագրած երկրներից ժամանած օդանավերի և ուղևորների նկատմամբ:
«Աշխարհի տարբեր երկրներում վարակիչ հիվանդությունների (բժշկությանը հայտնի է 80-ից ավելի վարակիչ հիվանդություն) բազմաթիվ բռնկումներ են արձանագրվում, ինչը բնակչության տեղաշարժը սահմանափակելու հիմք չէ, եթե վերջինիս համար չկան հիմնավոր պատճառներ»,- նշվում է մամուլի հաղորդագրությունում:
Առողջապահության համաշխարհային կազմակերպության պաշտոնական տեղեկատվության համաձայն` 2010 թվականի սեպտեմբերի 1-ի դրությամբ աշխարհում արձանագրվել է Արմտյան Նեղոսի տենդի 600-ից ավել դեպք` Հունաստանում, Հունգարիայում, Իսրայելում, Իտալիայում, Պորտուգալիայում, Ռումինիայում, Ռուսաստանում և Թուրքիայում: -0-
