Հայաստանն Ադրբեջանի անկառուցողական դիրքորոշումն օգտագործելով՝ Ղարաբաղի հետ ռազմաքաղաքական դաշինք կնքելու լիարժեք հնարավորություն ունի, երեքշաբթի լրագրողներին ասաց ՀՅԴ խմբակցության անդամ, արտաքին հարաբերությունների մշտական խորհրդարանական հանձնաժողովի ղեկավար Արմեն Ռուստամյանը։
«Ռազմաքաղաքական դաշինքի առկայությունը կնշանակի, որ Հայաստանն ի լուր ամենքի հայտարարում է, որ ԼՂՀ ժողովրդի կամարտահայտության, անկախության և անվտանգության երաշխավորն է, և դա ոչ պակաս կարևոր քայլ է, քան անկախութան ճանաչումը»,- ասաց Ռուստամյանը։
Ինչպես նշեց պատգամավորը, եթե Հայաստանը որպես անկախության և անվտանգության երաշխավոր արձանագրի իր դիրքորոշումները, ապա դա հավասար արդյունք կունենա Ղարաբաղի անկախության ճանաչման գործընթացի հետ։
Միաժամանակ, ըստ նրա՝ դրա համար այսօրվա դրությամբ կան բոլոր հիմքերը՝ հատկապես հաշվի առնելով կորուստների քանակը, որն Ադրբեջանի մեղքով գրանցվել է 1994թ.-ից սկսած շփման գծում։
«Սահմանում բազմաթիվ զոհեր են լինում Ադրբեջանի գործողությունների պատճառով, և դաշինքի կնքումը ոչ ոք չի քննադատի, քանի որ դա բխում է անվտանգության ապահովումից»,- ասաց Ռուստամյանը։
Ըստ նրա՝ Հայաստանը հնարավորություն և իրավունք ունի հայտարարելու, որ Ղարաբաղի անկախության և անվտանգության պաշտպանության հարցն այսօրվա դրությամբ առաջացել է Ադրբեջանի դիրքորոշումների պատճառով, որը չնայած բոլոր խիստ հայտարարություններին՝ դուրս չի գալիս բանակցային գործընթացից՝ հասկանալով, որ դա կարող է լուրջ ճնշման առիթ դառնալ։
Դրանով, ինչպես կարծում է խորհրդարանական հանձնաժողովի ղեկավարը, Հայաստանը աջակցություն կցուցաբերի նոր գործընթացին և Ղարաբաղի անկախության միջազգային ճանաչման սկզբի համար հիմք կդնի։
ՀՀ Ազգային ժողովը խորհրդարանական երկրորդ քառօրյայի ժամանակ՝ հոկտեմբերի 5-ին, կարող է օրակարգում ներառել և քննարկել «Ժառանգություն» ընդդիմադիր խմբակցության կողմից ներկայացված «ԼՂՀ անկախության ճանաչման մասին» օրինագիծը։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
