Վիկտոր Համբարձումյանի անվան միջազգային մրցանակի հանձնմանը 100 մլն դրամ է հատկացվել

Ականավոր աստղաֆիզիկոս Վիկտոր Համբարձումյանի անվան միջազգային մրցանակի  հանձնմանը  Հայաստանի կառավարությունը 100 միլիոն դրամ (մոտ 275 հազար դոլար) կհատկացնի, հինգշաբթի հայտարարեց ֆինանսների նախարար Տիգրան Դավթյանը կառավարության նիստի ընթացքում։ 

Վիկտոր Համբարձումյանի անվան միջազգային առաջին մրցանակը 2010 թվականին շնորհվել է շվեյցարացի աստղաֆիզիկոս, Շվեյցարիայի գիտությունների ակադեմիայի պրոֆեսոր Միշել Մայերին և նրա գիտական խմբի անդամներին։

Ողջ աշխարհից ուղարկած 14 աշխատանքներից ամենաարժանին է համարվել Մայերի և նրա գիտական խմբի անդամներին, մասնավորապես, Կանարյան կղզիների աստղաֆիզիկայի ինստիտուտի աշխատակից Գարիկ Իսրայելյանի և Պորտո համալսարանի (Պորտուգալիա) աստղաֆիզիկայի կենտրոնի աշխատակից Նունե Սանտոսիին աշծատանքը։ Մայերն առաջինն է հայտնաբերել արեգակի  տեսակի ատղի շուրջ պտտվող և արեգակնային համակարգից դուրս գտնվող մոլորակը։

500 հազար դոլարի չափով մրցանակը դափնեկիրներին կհանձնվի սեպտեմբերի 18-ին՝ Վիկտոր Համբարձումյանի ծննդյան օրը։

Վիկտոր Համբարձումյանի անվան միջազգային մրցանակը սահմանվել է 2009 թվականին Հայաստանի նախագահի կողմից։ Աստղաֆիզիկայի և աստղագիտության ոլորտի այս հեղինակավոր մրցանակը շնորհվում է ցանկացած երկրի և ազգության գիտնականների, ովքեր էական ավանդ են ներդրել գիտության զարգացման մեջ։

Վիկտոր Համբարձումյանը (1908-1996) հայտնի խորհրդային գիտնական է, տեսական աստղաֆիզիկայի հիմնադիրներից մեկը։ Համբարձումյանն աշխատել է աստղերի և ամպամածությունների ֆիզիկայի, աստղագիտության և աստղային համակարգերի դինամիկայի, աստղերի և գալակտիկաների տիեզերածնության (կոսմոգոնիայի) ոլորտներում։--0—