Այսօրվա դրությամբ Հայաստանը վերականգնել է կոնյակի՝ կորցրած արտաքին շուկայի միայն կեսը, երեքշաբթի լրագրողներին ասաց ՀՀ գինեգործների միության նախագահ Ավագ Հարությունյանը։
«Մենք կորցրել ենք մեր արտասահմանյան շուկան և այժմ վերականգնում ենք մեր դիրքերը։ Մենք կործրած 70-80 տոկոսից վերականգնել ենք շուրջ 40-45 տոկոսը։ Խոսքը կոնյակի արտասահմանյան շուկայի մասին է, գինու արտասահմանյան շուկա մենք գործնականորեն չունենք, և համապատասխանաբար ոչինչ էլ չենք կորցրել»,- նշեց նա։
Պաշտոնական վիճակագրական տվյալների համաձայն, 2009թ.-ի հունվար-դեկտեմբեր ամիսներին Հայաստանում ավելի քան 9,8 մլն լիտր կոնյակ է արտադրվել, ինչը 38,4 տոկոսով քիչ է 2008թ.-ի ցուցանիշից։ Միաժամանակ Հայաստանում 2010թ.-ի առաջին կիսամյակում կոնյակի արտադրությունը 38,2 տոկոսով ավելացել է և գերազանցել է 5 մլն լիտրը։
Միաժամանակ Հարությունյանն ավելացրեց, որ հայկական շուկայում վերջին շրջանում խաղացողներ են հայտնվել, ովքեր մեծ ուշադրություն են դարձնում գինու արտադրությանն ու արտահանմանը։ Միաժամանակ Միության ղեկավարն ընդգծեց, որ արտահանողի համար անհրաժեշտ է միայն որակյալ գինի արտադրել, սակայն 16,5 հազար հա հայկական խաղողի այգիներից միայն 1 հազար հա են խաղող տալիս, որը պիտանի է որակյալ գինի արտադրելու համար։
«Ներկայում գինու հայ արտադրողները փորձում են սեփական հումքային բազան ստեղծել, և եթե գյուղացիները ցանկանում են խաղող վաճառել գինու արտադրության համար, ապա պետք է լավորակ հումք արտադրեն»,- նշեց նա։
Ըստ Հարությունյանի, հայ գյուղացիները ԽՍՀՄի- փլուզումից հետո որպես սեփականություն խաղողի այգիներ են ստացել, որոնք չեն համապատասխանել ժամանակակից պայմաններին՝ ոչ ըստ տեսակի, ոչ ստացող բերքի, ոչ էլ ըստ ունեցած ագրոտեխնիկայի։
Ինչպես հիշեցրեց նա, ժամանակի ընթացքում 2001-2002թթ.-ին ունեցած 36 հազար հա խաղողի այգիներից 10 հազար հա խաղողի այգի է մնացել։ Միության ղեկավարը նշեց, որ լուծարվել են այն խաղողի այգիները, որոնք քիչ բերք են տվել, որոնցով անորակ հումք է աճեցվել։
Հարությունյանը նշեց, որ բարձրորակ խաղող աճեցվող խաղողի այգիների ոչ մի հեկտար, օրինակ «Արենի» տեսակը, չի լիկվիդացվել։ -0-
