Հայկական էստրադան օտար երաժշտության ազդեցության է ենթարկվում. Ջիվան Գասպարյան

Ժամանակակից հայկական էստրադան օտար երաժշտությունների մասնակի ազդեցությանն է ենթարկվում, կարծում է աշխարհահռչակ երաժիշտ, դուդուկի վարպետ Ջիվան Գասպարյանը:

«Ժամանակակաից հայկական երաժշտության որոշակի տոկոսն իրականում ենթարկվել է ոչ միայն թուրքական և արաբական, այլ նաև եվրոպական և արևմտյան երաժշտության ազդեցությանը, ինչն աղավաղում է ազգայինը»,- ուրբաթ լրագրողներին ասաց վարպետը:

Ինչպես նշեց Գասպարյանը, երբեք հայկական էստրադան այս աստիճան գերհագեցած չի եղել երաժիշտներով ու երգիչներով:

«Ժամանակակից հայկական երաժշտության որակի ցածր մակարդակը վկայում է, որ պակասում են պրոֆեսիոնալները: Եվ դա վերաբերում է ոչ միայն երաժշտությանը, այլ նաև հեռուստատեսությանը”,- ավելացրեց երաժիշտը:

Այդ կապակցությամբ Գասպարյանը նշեց ազգային երաժշտության` որպես հայկական մշակույթի սյուներից մեկի պահպանման անհրաժեշտությունը:

Թուրքերի կողմից հայկական ազգային երգերի կատարման դեպքերի մասին խոսելիս՝ վարպետը նշեց, որ հանդիպել է նման երևույթների Թուրքիայի հյուրախաղերի ժամանակ, որտեղ ունկնդիրների հիմնական մասը թուրքեր են եղել:

«Թուրքիայում ունեցած համերգներից հետո, երբ ունկնդիրների շուրջ 80 տոկոսը թուրքեր են, ինձ շատ անգամ են զարմացած հարցրել, թե ինչ երաժշտություն եմ կատարում, այն նրանց ծանոթ է թուրք երաժիշտների կատարմամբ»,- ասաց Գասպարյանը: Նա ընդգծեց, որ միշտ անկեղծորեն պատասխանել է, որ իր ծրագրացուցակում հնչում է հայկական ազգային երաժշտությունը:

Երգիչ և երաժիշտ Արսեն Գրիգորյանն (Մրո) իր հերթին անընդունելի է համարել հայկական ազգային երաժշտությունը թուրքական կատարմամբ, թուրքերեն լեզվով հնչեցնելը: «Դա մեր անցյալը, ներկան և ապագան է, և մենք պարտավոր են պահպանել մեր երաժշտությունը»,- ընդգծեց Գրիգորյանը: -0-