ԵՐԵՎԱՆ, 12 օգոստոսի. /Նովոստի-Արմենիա/. Կամավորության մասին կարճամետրաժ տեսաֆիլմերի երիտասարդական փառատոնի հաղթողների պարգևատրման արարողությունն է տեղի ունեցել ՄԱԿ-ի երևանյան գրասենյակում հինգշաբթի։
Երիտասարդության միջազգային օրվան նվիրված միջոցառման շրջանակներում փառատոնի հաղթողներին՝ Արա Մելիքջանյանին և «Ագաթ» հասարակական կազմակերպությանը որպես մրցանակ բջջային հեռախոսներ և ֆոտոխցիկներ հանձնվեցին։
«Մրցույթին մասնակցելու համար ներկայացվել են ինչպես անհատների, այնպես էլ կազմակերպությունների աշխատանքներ»,- միջոցառմանն ասաց ՄԱԿ-ի երևանյան գրասենյակի հասարակական տեղեկատվության վարչության ներկայացուցիչ Մարիա Դոցենկոն։
Ըստ նրա, ներկայացված տասնմեկ աշխատանքներից ընտրվել է ինը տեսաֆիլմ։
Պարգևատրման արարողությանը զուգահեռ ՄԱԿ-ի գրասենյակում անցկացվեց Հայաստանում կամավորությամբ առավել ակտիվորեն զբաղվող կազմակերպությունների ցուցահանդես։
«Միջոցառման բոլոր տվյալները նվիրված են Երիտասարդության միջազգային օրվան, որն այս տարի նշանավորում է ՄԱԿ-ի կողմից հռչակած Երիտասարդության տարվա սկիզբը»,- ասաց Դոցենկոն։
Ըստ նրա, Երիտասարդության տարվա շրջանակներում, որը կանցնի «Երկխոսություն և փոխմբռնում» կարագխոսով, ՄԱԿ-ի երևանյան գրասենյակը ծրագրում է մի շարք միջոցառումներ։
Մասնավորապես, Դոցենկոյի խոսքերով, Հայատանի կառավարության հետ համատեղ կկազմակերպվի ազգային փոքրամասնությունների ճամբար, որի մասնակիցները կկարողանան տեղեկատվություն ստանալ Հայաստանում մարդու իրավունքների և ազատությունների մասին։
Իր հերթին Հայաստանում ՅՈՒՆԻՍԵՖ-ի ներկայացուցիչ Լեյլի Մոշիրին, կարևորելով երիտասարդության դերը հասարակական կյանքում և պետության կյանքում ընդհանուր առմամբ, նշեց երիտասարդությանն ուղղված պետօժանդակության անհրաժեշտությունը։
«Ներկայիս սոցիալական և տնտեսական մարտահրավերները պայմանավորում են երիտասարդության նկատմամբ հատուկ ուշադրությունը»,- ասաց նա, նշելով, որ երիտասարդության էներգիան կարող է դառնալ տատանվող տնտեսությունների շարժող ուժը։
Երիտասարդության միջազգային օրը (International Youth Day) սահմանվել է ՄԱԿ-ի Գերագույն Ասամբլեայի կողմից 1999 թվականի դեկտեմբերի 17-ին՝ 1998 թվականի օգոստոսի 8-12-ը Լիսաբոնում կայացած երիտասարդական գործերի նախարարների համաշխարհային կոնֆերանսի առաջարկությամբ։
Առաջին անգամ Երիտասարդության օրը նշվել է 2000 թվականի օգոստոսի 12-ին։ -0-
