ՀՄՊ ժամանակների ռազմական ինքնաթիռների լուսանկարների ցուցահանդես կանցկացվի Երևանում

«Կրիլատայա պամյատ պոբեդի» («Հաղթանակի թևավոր հիշատակ») լուսանկարների ցուցահանդեսը, որը լիովին նվիրված է Հայրենական Մեծ պատերազմի տարիների ռազմական ինքնաթիռներին, կանցկացվի Երևանում, ասաց լուսանկարների ցուցահանդեսի պատասխանատու Եվգենի Սյոմինը:

 «Այդ գունավոր լուսանկարներում մենք ցուցադրում ենք ինքնաթիռներ, որոնք մասնակցել են Հայրենական Մեծ պատերազմին: Դրանք կրկին վերականգնվել են, դրանք թռչում են»,- չորեքշաբթի հայ լրագրողներին հայտնեց նա:

Ցուցահանդեսը կանցկացվի Երևանի գործարար-մշակութային կենտրոնում՝ Մոսկվայի տանը, օգոստոսի 12-15-ը «Ժամադրություն Հայաստանի հետ» հայ-ռուսական մշակութային ակցիայի շրջանակներում:

Ըստ Սյոմինի, ցուցադրության մեջ ներառված են ինքնաթիռների լուսանկարներ, որոնք արվել են ԱՄՆ-ի, Նոր Զելանդիայի շքերթների ժամանակ, իսկ մի քանի դրվագներում կարելի է տեսնել ճահճուտից ինքնաթիռների հանելու գործընթացը:

Նա ավելացրեց, որ այդ ռազմական ինքնաթիռների շարժիչները շատ լավ են պահպանվել, ինչը թույլ է տվել սիրողական ռեստավրատորներին լիովին վերականգնել դրանց թռիչքային գործառույթները:

 «Ժամադրություն Հայաստանի հետ» առաջին հայ-ռուսական մշակութային ակցիան՝ նվիրված Մեծ Հաղթանակի 65-ամյակին, կանցկացվի օգոստոսի 12-15-ը Երևանում և Գյումրիում:

Ռուսական պատվիրակության կազմում ներառված են խորհրդային ռուսական կինեմատոգրաֆի վառ ներկայացուցիչները, ովքեր ժամանակին նկարահանվել են հայ-ռուսական համատեղ ֆիլմերում: Նրանց թվում են ԽՍՀՄ ժողովրդական արիստ Իննա Մակարովան, ԽՍՀՄ ժողովրդական արտիստ Եվգենի Դոգուն, Ռուսաստանի ժողովրդական արտիստ Նատալյա Ֆատեևան, Ռուսաստանի վաստակավոր արտիստներ Նատալյա Վառլեյն ու Սվետլանա Սվետլիչնայան, Սվետլանա Տոման (Ֆոմիչևա), Տիմոֆեյ Ֆեդորովը, Անդրեյ Մեժուլիսը: -0-