Հայ վետերանները Գյումրիում ծանոթացել են ռուսական զինվորական գերեզմանատան բարեկարգման աշխատանքներին

Գյումրիում երկուշաբթի Պատվի Բլուր զինվորական գերեզմանատան բարեկարգման աշխատանքներին են ծանոթացել Մեծ Հայրենական, Աֆղանական և Արցախյան պատերազմների մոտ 100 վետերաններ, «Նովոստի-Արմենիա» գործակալությանը հայտնեցին «Պատվի գործ» հայ-ռուսական բարեգործական կազմակերպության մամուլի ծառայությունից:

Գյումրիում «Պատվի բլուր» ռուսական զինվորական գերեզմանատան բացումը տեղի կունենա 2010թ.-ի օգոստոսին՝ բարեկարգման աշխատանքների ավարտից հետո։

Բարեկարգման աշխատանքների գլխավոր պատվիրատու «Պատվի գործ» հայ-ռուսական բարեգործական կազմակերպության համանախագահ Անդրանիկ Նիկողոսյանը վետերաններին ներկայացրեց Պատվի Բլրի պատմությունը, ինչպես նաև նվիրեց կազմակերպության կողմից պատրաստված «Պատվի Բլրի վերածնունդը» ալբոմներ:  Անդրանիկ Նիկողոսյանն իր խոսքում ասաց, որ Պատվի Բլուրը երկու ժողովուրդների ընդհանուր պատմության մարմնացումն է:

Վետերաններն իրենց հերթին, բարձր գնահատեցին կատարված աշխատանքները: Հայրենական Մեծ պատերազմի վետերանների անունից ելույթ ունեցող Ռոբերտ Մելքոնյանը շեշտեց «Պատվի գործ» ռուս-հայկական կազմակերպության համանախագահ Անդրանիկ Նիկողոսյանի անձնական ավանդը աշխատանքները բարեխղճորեն իրականացնելու հարցում: «Լինելով գյումրեցի` մշտապես հետևել եմ շինարարությանը»,- նշեց վետերանը:

Գյումրի քաղաքում վերականգնվում է «Պատվի բլուր» կոչվող` 1853-56թթ. և 1877-78թթ. ռուս-թուրքական պատերազմներում զոհված ռուսական բանակի սպաների և զինվորական բժիշկների գերեզմանատունը, որի տեղում անցած դարի 50-ական թվականներին կառուցվել էր մանկական առողջարան:

ՀՀ Շիրակի մարզպետի և ՌԴ Ուլյանովսկի նահանգապետի համագործակցության արդյունքում, ՀՀ և ՌԴ իշխանությունների աջակցությամբ, 2009թ. դեկտեմբերից սկսվել էին քանդման, վերակառուցման ու բարեկարգման աշխատանքները, որոնք ամբողջությամբ իրականացնում է հատուկ այդ նպատակով ստեղծված  «Պատվի գործ» ռուս-հայկական բարեգործական կազմակերպությունը: -0-