Հայաստանի և Եվրոպական Միության միջև ասոցացման համաձայնագրի համար բանակցողների թիմ է ստեղծվել Հայաստանում

ԵՐԵՎԱՆ, 16 հուլիսի. /Նովոստի-Արմենիա/. ՀՀ նախագահ Սերժ Սարգսյանը նախօրեին կարգադրություն է ստորագրել Հայաստանի և Եվրոպական Միության միջև ասոցացման համաձայնագրի շուրջ բանակցությունների համար պատասխանատու թիմ և ոլորտային խմբեր ստեղծելու մասին, հաղորդում է ՀՀ նախագահի մամուլի ծառայությունը:

Բանակցային թիմի ընթացիկ աշխատանքներն իրականացնող քարտուղարության գործառույթներն իրականացնում է ՀՀ արտաքին գործերի նախարարությունը: Բանակցային թիմի համակարգող է նշանակվել ՀՀ արտաքին գործերի նախարար Էդվարդ Նալբանդյանը, գլխավոր բանակցող` ՀՀ արտաքին գործերի նախարարի տեղակալ Կարինե Ղազինյանը:

Հայաստանի և Եվրոպական Միության միջև ասոցացման համաձայնագրի շրջանակներում նախատեսված բանակցությունները մեկնարկում են հուլիսի 19-ին Երևանում: Համաձայնագրի կնքմանն ուղղված բանակցությունների մեկնարկի մանդատը հաստատվել է մայիսի 12-ին: Այս գործընթացը վերաբերում է քաղաքական, տնտեսական բարեփոխումների, արդարադատության, մարդու իրավունքների հարցերին:-0-