ԵՐԵՎԱՆ, 24 հունիսի./Նոովստի-Արմենիա/. Հայաստանի իշխանություններն ու Լեռնային Ղարաբաղի Հանրապետության պաշտպանության բանակը պետք է թափանցիկ հետաքննություն անցկացնեն Ղարաբաղի և Ադրբեջանի սահմանի շփման գոտում Ադրբեջանի դիվերսիայի փաստի առիթով, այդ կարծիքին է ՀՀ նախկին արտգործնախարար, ընդդիմադիր ՀԱԿ ներկայացուցիչ Ալեքսանդր Արզումանյանը։
Հունիսի 18-ին Չայլու գյուղի մերձակայքում Ադրբեջանից ԼՂՀ տարածք է ներխուժել զինված հետախուզական խմբավորում: Սահմանն անցած ադրբեջանցիներին հաջողվել է թափանցել ղարաբաղա-ադրբեջանական զորքերի շփման գոտու հյուսիսարևելյան հատված: Տեղի է ունեցել դիմահար մերձամարտ: Թողնելով մեկ դիակ և զինամթերք` թշնամին հետ է քաշվել: Մարտի արդյունքում հայկական կողմը տվել է չորս զոհ, չորս վիրավոր:
«Այդ խախտման հետևանքներն անթույլատրելի են, և ես կարևոր եմ համարում, որպեսզի իշխանություններն ու բանակի հրամանատարությունը թափանցիկ հետաքննություն անցկացնեն, որպեսզի պարզեն այդ դիվերսիոն գործողության պատճառները։ Եվ արդեն պետք է լուրջ ուշադրություն դարձնել բանակի ներքին կարգապահությանը»,- ասաց Արզումանյանը։
Այդ կապակցությամբ ԱԳՆ նախկին ղեկավարը նշել է միջադեպի վերաբերյալ Ռուսաստանի և ԱՄՆ-ի ծայրահեղ չեզոք արձագանքը, այն ժամանակ, երբ Ադրբեջանի մեղքը միջադեպում միանգամայն ակնհայտ է։
Արզումանյանը նշեց, որ ՀՀ ԱԳՆ-ն պետք է ծայրաստիճան սուր արձագանքեր միջադեպին՝ այդ մասին տեղեկացնելով համաշխարահյին հանրությանը, որպեսզի Ադրբեջանի մեղավորության մասին ոչ մեկի մոտ կասկածի նշույլ անգամ չմնար ։
ՀՀ ԱԳՆ նախկին ղեկավարն ավելացրեց, որ եթե Ադրբեջանը պատերազմ սկսելու համար համապատախսան երաշխիքներ ստանա, նա ռազմական գործողություններ կսկսի։
«Հաճախ է խոսվում այն մասին, որ նման հակամարտությունները չեն կարող ռազմական լուծում ունենալ, սակայն դա այդպես չէ»,- ասաց նա։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
