Հայաստանը խորը կառուցվածքային բարեփոխումների կարիք ունի. ՀԲ

Հայաստանում խորը կառուցվածքային բարեփոխումների անհրաժեշտություն կա, կարծում է Համաշխարհային բանկի երևանյան գրասենյակի ղեկավար Արիստոմենե Վարուդակիսը:

«Խոսքը մրցակցության, հարկային և մաքսային դաշտի, պետական մակարդակով կոռուպցիայի նվազման, ինչպես նաև տրանսպորտային և էներգետիկ ենթակառուցվածքների բարելավման մասին է», - ուրբաթ ասաց նա մամուլի ասուլիսի ժամանակ:

Վարուդակիսը ընգծեց նաև մարդկային ռեսուրսների մեջ ներդրումները շարունակելու անհրաժեշտությունը, ինչը կնպաստի տնտեսության զարգացմանն ու դիվերսիֆիկացմանը:

«Դա տնտեսությունն ավելի «առաձգական» կդարձնի տնտեսական ցնցումների նկատմամբ», - պարզաբանեց նա:

ՀԲ երևանյան գրասենյակի ղեկավարը հիշեցրեց նաև, որ «Հայաստանի տնտեսությունն իր երկնիշ աճով համարվում էր ամենահզորներից մեկը, նրան անվանում էին «կովկասյան վագր»»:

Վերջին մի քանի տարվա ընթացքում մակրոտնտեսական ցուցանիշները դրական դինամիկա են ցուցադրում, իսկ Հայաստանի ՀՆԱ աճը բնութագրվում էր երկնիշ թվերով: Այսպես, 2002 թ.-ին Հայաստանում ՀՆԱ-ի աճը 13,2 տոկոս էր, 2003 թ.-ին` 14 տոկոս, 2004 թ.-ին` 10,5 տոկոս, 2005 թ.-ին` 14 տոկոս, 2006 և 2007 թթ.-ին` 13,7 տոկոս, ապա 2008 թ.-ին այդ ցուցանիշը նվազեց մինչև 6,8 տոկոսի, իսկ 2009 թ.-ի առաջին կեսից աճը փոխարինվեց անկմամբ` տարվա արդյունքում կազմելով -14,4 տոկոս:

Այս կապակցությամբ Վարուդակիսը կասկած հայտնեց, որ ավելի դիվերսիֆիկացված տնտեսությունը կարող է 12 տոկոսանոց տարեկան աճ գրանցել:

«Տնտեսությունն աճելու է ավելի դանդաղ տեմպերով, հնարավոր է` 7-8 տոկոսի սահմաններում, սակայն ավելի պակաս դրամատիկ տատանումներով», - եզրափակեց նա:

Վիճակագրության պաշտոնական տվյալների համաձայն` հայկական տնտեսության մեջ հունվար-ապրիլին գրանցվել է 7,2 տոկոսի աճ` 2009 թ.-ի նույն ժամանակահատվածի համեմատ:

Պետբյուջեի համաձայն` Հայաստանում 2010 թ.-ին ՀՆԱ-ի աճը նախատեսված է 1,2 տոկոսի սահմաններում: ԱՄՀ-ի կանխատեսումների համաձայն` Հայաստանում 2010 թ.-ի արդյունքում տնտեսական աճը կկազմի 4 տոկոս, իսկ ՀԲ-ն այդ ցուցանիշը կանխատեսում է 4-5 տոկոսի սահմաններում:-0-