ՀՀ ԱԺ խոսնակ Հովիկ Աբրահամյանն ու ԵԽԽՎ նախագահ Մևլութ Չավուշօղլուն Լիմասոլում (Կիպրոս) խորհրդարանների նախագահների եվրոպական համաժողովի շրջանակում կայացած հանդիպման ժամանակ պայմանավորվել են չափազանց զույշ գործել ղարաբաղյան հակամարտության կարգավորմանը վերաբերող հարցերում:
«Հանդիպման ընթացքում քննարկվեցին Հայաստանի կողմից ԵԽԽՎ բանաձևերի իրականացման ընթացքը, ինչպես նաև ԼՂ հարցով ԵԽԽՎ ժամանակավոր հանձնաժողովի շուրջ ծավալվող զարգացումները: Պայմանավորվածություն ձեռք բերվեց, որ հանձնաժողովի աշխատանքների վերսկսման հարցում պետք է ցուցաբերել շատ զգուշավոր մոտեցում: Պետք է այնպիսի քայլեր անել, որպեսզի որեւէ կերպ չխաթարվի բանակցային գործընթացը ԵԱՀԿ Մինսկի խմբի շրջանակներում», - հաղորդում է ՀՀ ԱԺ հասարակայնության և տեղեկատվության միջոցների հետ կապի վարչությունը:
Զրուցակիցները նշել են, որ Ադրբեջանի կողմից ռազմատենչ հայտարարությունները որևէ կերպ չեն նպաստում վստահության մթնոլորտի ձևավորմանը և համագործակցությանը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
