Հայաստանը կարող է համոզված լինել՝ Ռուսաստանը վստահելի դաշնակից է. դեսպան
Հայաստանի հետ ռազմավարական միության բազմակողմանի ընդլայնումը Ռուսաստանի արտաքին քաղաքականության գլխավոր խնդիրներից մեկն է, հինգշաբթի ասել է ՀՀ-ում ՌԴ արտակարգ և լիազոր դեսպան Վյաչեսլավ Կովալենկոն՝ ելույթ ունենալով Ռուսաստանի օրվա կապակցությամբ Երևանում կազմակերպված ընդունելության ժամանակ: Ռուսաստանի օրը նշվում է հունիսի 12-ին:
«Հայաստանը կարող է համոզված լինել՝ Ռուսաստանը վստահելի դաշնակից և գործընկեր է: Ռուսաստանն այն երկիրն է, որին կարելի է վստահել ազգային խնդիրների լուծման ժամանակ: Այս ամենը բազմիցս ապացուցել է մեր բարեկամության և փոխգործակցության բազմադարյա պատմությունը: Մեր խնդիրն է շարունակել այդ ուղղությունը, հոգատարությամբ վերաբերվել մեր նախնիների պատգամներին: Միայն նման քաղաքականությունն է համապատասխանում մեր եղբայրական ժողովուրդների շահերին», - նշել է դեսպանը:
Կովալենկոն ավելացրել է, որ ռուս-հայկական բարեկամությունը հետագայում ևս ամրապնդվելու է: «Համգործակցության ընդլայնման հեռանկարներ են նախատեսված տնտեսական, հումանիտար, գիտատեխնիկական ոլորտներում: Ռուսաստանի Դաշնության սուբյեկտների և Հայաստանի մարզերի միջև տնտեսական կապերի ամրապնդման ծրագրեր կան», - ասել է նա՝ ավելացնելով, որ երկու երկրները մտադիր են այսուհետ ևս միջազգային հարթակներում հանդես գալ համաձայնեցված դիրքորոշումներով:
Նրա խոսքերով՝ Ռուսաստանի օրը միայն ռուսական տոն չէ: «Այս սրահում կան բազմաթիվ Հայաստանի քաղաքացիներ, ովքեր իրական հայրենասեր են, սակայն սերտորեն կապված են Ռուսաստանի հետ: Իրենք չեն կիսում մեր ընդհանուր պատմությունը սեփականի և օտարի, նրանք շատ լավ հասկանում են, որ միայն միասին կարելի է հաղթահարել գոյություն ունեցող խնդիրները, միայն հաղորդակցվելով է հնարավոր կառուցել ապագան», - ընդգծել է Կովալենկոն:-0-
