Հայաստանում տեղեկատվական տեխնոլոգիաների ոլորտը դինամիկ կերպով զարգանում է, ասաց ՀՀ վարչապետ Տիգրան Սարգսյանը:
«ՏՏ ոլորտը դինամիկ զարգացող ոլորտ է, և մեր քաղաքացիները տարեցտարի զգում են սպասարկման որակի, մատչելիության աճն ու գների նվազումը, և ես կարծում եմ, որ կառավարության կողմից ձեռնարկված միջոցառումները պետք է հենց նման ուղղվածություն ունենան», - ասաց Սարգսյանը չորեքշաբթի Երևանում երրորդ ամենամյա DigiTec Business ցուցահանդես-ֆորումի բացման ժամանակ:
Նրա խոսքերով՝ վերջին տարվա ցուցանիշները վկայում են այս բնագավառի դրական միտումների մասին, որը կառավարությունը մի քանի տարի առաջ գերակա էր հայտարարել:
«2009 թ.-ին չնայած տնտեսական ճգնաժամը բացասաբար ազդեց բոլոր մակրոտնտեական ցուցանիշների վրա, և մենք ՀՆԱ-ի անկում գրանցեցինք, ՏՏ-ի գծով աճ գրանցվեց: ՀՆԱ-ի կառույցում այս ոլորտն արդեն համադրվում է լեռնահանքային արդյունաբերության հետ», - ասաց Սարգսյանը:
Ինչպես նշեց վարչապետը, շահույթը կազմում է 130 միլին դոլար, որից ավելի քան 70 միլիոն դոլարը արտահանումից ստացված շահույթն է, իսկ ոլորտում զբաղված անձանց թիվը գերազանցում է հինգ հազարը, որոնցից 4,5 հազարը տեխնիկական մասնագետներ են:
Նրա խոսքերով՝ միաժամանակ բուհական համակարգում ներգրավված է ՏՏ ոլորտի ավելի քան 6 հազար ուսանող, ինչը վկայում է այն մասին, որ տեղեկատվական տեխնոլոգիաները կայուն զարգացման միտումներ են ունենալու:
Նա նաև նշեց, որ այսօրվա դրությամբ կառավարության ուշադրության կենտրոնում է հարցերի մի մեծ ցանկ, որտեղ հրատապերից մեկը երկակի նշանակության ապրանքների արտահանման հետ կապված օրենսդրության կատարելագործումն է:
«Մենք աշխատանքային խումբ ենք ստեղծել, որը պետք է իր առաջարկները ներկայացնի, թե ինչպիսի փոփոխություններ և նոր մեթոդներ են անհրաժեշտ այս ոլորտում արտահանումը հեշտացնելու համար», - ասաց Սարգսյանը:
Ինչ վերաբերում է ֆորումին, ապա, ինչպես նշեց վարչապետը, սա արդեն ավանդական միջոցառում է, որը ցուցադրում է իր արդյունավետությունն ու բացառիկ վայր է շփման և պայմանավորվածությունների ձեռքբերման, շուկայի ձեռքբերումների հետ ծանոթանալու համար և հասարակության համար ՏՏ զարգացման ազդակ է՝ ցուցադրելով, թե Հայաստանում ինչ մակարդակի վրա է գտնվում տեղեկատվական տեխնոլոգիաների զարգացումը:
«Մենք հետևում ենք այս միջոցառմանը և փորձում ենք ակտիվորեն աջակցել, քանի որ տեսնում ենք, որ այն, իսկապես, արդյունքներ է տալիս: Այս մասին վկայում է նաև այն փաստը, որ տարեցտարի աճում է մասնակից-ընկերությունների թիվը», - ասաց Սարգսյանը՝ ընդգծելով ֆորումին start-up ընկերությունների ակտիվ մասնակցությունը:
Բիզնեսում տեղեկատվական տեխնոլոգիաների կիրառման հարցերին նվիրված երրորդ ամենամյա DigiTec Business ցուցահանդես-ֆորումն անցկացվում է Երևանում հունիսի 9-10-ը: Միջոցառմանը մասնակցում են շուրջ 40 տեղական և օտարերկրյա ընկերություններ, որոնք ներկայացնում են իրենց լուծումները ֆինանսաբանկային, զբոսաշրջային, առևտրի, շինարարության, տրանսպորտի և դեղագործության ոլորտներում:
DigiTec Business ցուցահանդես-ֆորումի կազմակերպիչն է Տեղեկատվական տեխնոլոգիաների ձեռնարկությունների միությունը (UITE): Ֆորումն անցկացվում է ՀՀ էկոնոմիկայի նախարարության աջակցությամբ՝ ՀՀ վարչապետի բարձր հովանու ներքո: Միջոցառման տեղեկատվական հովանավորներն են «ԱՌԿԱ» լրատվական գործակալությունը, «Նովոստի-Արմենիա» միջազգային լրատվության գործակալությունը:-0-
