Ուրբաթ Հայաստանի և Լեռնային Ղարաբաղի 39 քննական կենտրոններում ավելի քան 11 հազար պատանի հայոց լեզու և գրականություն առարկայից պետական միասնական քննություն է հանձնում։
«Հայոց լեզվի և գրականության քննությունն այն հանձնող անձանց թվով ամենամեծն է»,- Երևանի պետական համալսարանում քննական կենտրոն այցելության ժամանակ լրագրողներին ասաց Գնահատման և թեստավորման կենտրոնի տնօրեն Գուրգեն Խաչատրյանը։
Նա նշեց, որ ըստ օպերատիվ տվյալների՝ բոլոր կենտրոններում քննությունները նորմալ են անցնում, ոչ մի միջադեպ և խախտում չի արձանագրվել։
«Հայոց լեզվի թեստերն, ինչպես և մնացած առարկաներինը, կազմվել են դպրոցական ծրագրերի շրջանակներում, այնպես որ ոչ մի դժվարություն չպետք է լինի»,- ասաց Խաչատրյանը։
Նա ավելացրեց, որ քննության արդյունքները կհրատարակվեն հինգ օրվա ընթացքում, որից հետո շրջանավարտնն, ըստ ցանկության, կարող է այն բողոքարկել։
Առաջին երեք առարկաների՝ աշխարհագրության, ընդհանուր պամության և կենսաբանության ՊՄՔ-ի արդյունքների մասին խոսելիս, որոնք շրջանավարտները հանձնել են երեքշաբթի՝ հունիսի 1-ին, ԳԹԿ տնօրենը հայտնեց, որ պաշտոնական տվյալները կհրապարակվեն շաբաթ օրը։
«Ըստ նախնական տվյալների՝ արդյունքներն ավելի վատ են, քան ակնկալվում էին։ Կենսաբանությունից շրջանավարտների 22 տոկոսն անբավարար գնահատական է ստացել»,- ավելացրեց Խաչատրյանը։
ՊՄՔ հիմնական փուլը 2010թ.-ին Հայաստանում կտևի մինչև հունիսի 23-ը։ ՊՄՔ-ին կմասնակցի Հայաստանի և Լեռնային Ղարաբաղի ավելի քան 17 հազար շրջանավարտ։
ՊՄՔ կանցկացվի 10 առարկաներից՝ հայոց լեզու և գրականություն, կենսաբանություն, ընդհանուր պատմություն, աշխարհագրություն, ֆիզիկա, մաթեմատիկա, հայոց պատմություն, քիմիա, ռուսաց լեզու և օտար լեզու (անգլերեն, ֆրանսերեն, գերմաներեն, իսպաներեն, իտալերեն կամ պարսկերեն)։ -0-
