ԵՐԵՎԱՆ, 31 մայիսի. /Նովոստի-Արմենիա/. «Արմավիա» ընկերության Երևան-Արխանգելսկ-Երևան օդային նոր հաղորդակցության բացման պաշտոնական արարողությունը տեղի է ունեցել կիրակի Արխանգելսկի միջազգային օդանավակայանում, տեղեկացնում է «Արմավիա» ավիաընկերության մամուլի քարտուղար Նանա Ավետիսովան:
«Հայկական ներկայացուցչական պատվիրակության ժամանումն Արխանգելսկ ոչ միայն նոր չվերթի բացումն է, այլև օդային կամուրջ Հայաստանի և Ռուսաստանի միջև»,- օդանավակայանում ասաց Ռուսաստանում Հայաստանի դեսպան Օլեգ Եսայանը:
Ըստ նրա՝ նոր երթուղով բարեկամական երկրների միջև հարաբերությունների ամբողջ համակարգի հետագա զարգացման ևս մեկ լծակ է ստեղծվում, մասնավորապես, տնտեսական և մշակութային ոլորտներում: Այս կապակցությամբ նա ընդգծեց, որ երկու պետությունների ղեկավարները՝ և ՌԴ նախագահ Դմիտրի Մեդվեդևը, և ՀՀ նախագահ Սերժ Սարգսյանը, հատուկ ուշադրություն են դարձնում տարածաշրջանային զարգացմանն ու համագործակցությանը:
Օլեգ Եսայանի կարծիքով՝ Հայաստանը զգալի հետաքրքրություն է ներկայացնում Արխանգելսկի մարզի համար, համագործակցության մեծ ներուժ կա նաև զբոսաշրջային ոլորտում, քանի որ Հայաստանը նաև զբոսաշրջային երկիր է, որը գրավում է զբոսաշրջիկների ավելի ու ավելի մեծ զանգվածի ուշադրությունը:
Իր հերթին «Արմավիա» ավիաընկերության նախագահ Միխայիլ Բաղդասարովը հայտարարեց, որ Երևանն այսօր տարանցիկ քաղաք է, որը միացնում է Հյուսիսը Հարավին և Արևելքն Արևմուտքին:
«Սկզբից չվերթը կիրականացվի երկու շաբաթը մեկ անգամ, այնուհետև՝ շաբաթը մեկ անգամ, իսկ հետագայում շաբաթը երկու անգամ, քանի որ ժամանակ է անհրաժեշտ, որպեսզի զբոսաշրջային ընկերությունները համապատասխան կապեր հաստատեն, մարքեթինգային քաղաքականություն մշակեն, և այս ամենը հանգեցնում է նրան, որ չվերթը բավականին շահութաբեր կլինի»,- ավելացրեց ընկերության ղեկավարը:
Նա ասաց, որ հայկական մայրաքաղաքի աշխարհագրական դիրքն արդեն թույլ է տալիս տեղափոխել ուղևորներին Արխանգելսկից Երևան, իսկ Երևանից Դուբայ, Դելի, Անթալիա, Թունիս, Շարմ էլ Շեյխ և շատ այլ հարավային քաղաքներ և ծովափնյա քաղաքներ, որտեղ նրանք կարող են հանգստանալ:
Բացի այդ, ըստ նրա, տարանցման օրինակ է ծառայում ավիաընկերության՝ Թբիլիսիից Ռուսաստան չվերթը, վերջերս Դելիում բացված չվերթը նույնպես տարանցման ուղի կլինի դեպի Արևմուտք:
Իր հերթին Արխանգելսկի մարզի արդյունաբերության, տրանսպորտի և կապի նախարար Էռնեստ Բելոկորովինն ավելացրեց, որ Երևանի և Արխանգելսկի միջև բանակցությունների առարկա կարող է դառնալ հետագա համագործակցությունը տվյալ չվերթի շրջանակներում, քանի որ այդ գիծը կարող է հետագայում միացնել Հայաստանն ԱՄԷ-ի հետ:
Երևան-Արխանգելսկ-Երևան շվերթի բացման արարողությունից հետո տեղի ունեցավ Արխանգելսկի նահանգապետ Իլյա Միխալչուկի հանդիպումը Ռուսաստանում Հայաստանի դեսպան Օլեգ Եսայանի հետ, որին մասնակցեցին երկու երկրների բարձրաստիճան պաշտոնյաներ: -0-
