ՀՐԱՏԱՊ. Գռիզլովը բացասական է վերաբերվում ռուս պատգամավորներին պերսոնա նոն-գրատա հայտարարելու մասին ադրբեջանի որոշմանը

ՌԴ Պետդումայի նախագահ Բորիս Գռիզլովը բացասական է վերաբերվում ռուս պատգամավորներին պերսոնա նոն-գրատա հայտարարելու մասին ադրբեջանի որոշմանը:

Ադրբեջանի արտգործնախարարությունը պերսոնա նոն-գրատա է հայտարարել ՌԴ Պետդումայի հինգ պատգամավորների՝ Կոնստանտին Զատուլինին, Իգոր Չեռնիշենկոյին, Կիրիլ Չերկասովին, Տատյանա Վոլոժինսկայային և Մաքսիմ Միշչենկոյին՝ մայիսի 23-ին Լեռնային Ղարաբաղի Հանրապետությունում կայացած խորհրդարանական ընտրությունները մոնիտորինգի ենթարկելու համար:

Այս ցանկում են հայտնվել նաև Պետդումային առընթեր ռուսանողական խորհրդարանի անդամ, միջազգային դիտորդ Գալինա Ռատնիկովան, հասարակական-քաղաքական գործիչ Վիկտոր Շեյնիսը, Ռազմավարական մշակույթի հիմնադրամի փորձագետ Անդրեյ Արեշևը: Ցանկում են ընդգրկված նաև Ֆրանսիայի, Գերմանիայի, Արգենտինայի, Իրանի և մի շարք այլ երկրների քաղաքացիներ:

«Ես, իհարկե, դեմ եմ նման որոշմանը: Կարծում եմ, որ այստեղ այլ կարծիք չի կարող լինել: Պատգամավորները, որոնք գտնվում էին Լեռնային Ղարաբաղում և հետևում էին ընտրություններին, Պետական Դումայի պաշտոնական պատվիրակություն չէին: Այնուամենայնիվ, որքան ես գիտեմ, Լեռնային Ղարաբաղի տարածքում ներկա էին տարբեր երկրները ներկայացնող հարյուրից ավելի դիտորդներ: Եվ այստեղ որոշումը հենց ռուս պատգամավորների մասին է, իհարկե, ես բացասական եմ դրան վերաբերվում», - ասել է Գռիզլովը երկուշաբթի Երևանում՝ պատասխանելով «Նովոստի-Արմենիա» գործակալության հարցին:-0-