ԵՐԵՎԱՆ, 31 մայիսի. /Նովոստի-Արմենիա/. Հայաստանը ՀԱՊԿ-ի վստահելի գործընկերն ու դաշնակիցն է, ասել է ՀՀ ԱԺ խոսնակ Հովիկ Աբրահամյանը:
1992 թ.-ի մայիսին ստեղծված ՀԱՊԿ մասնակիցներն են յոթ պետություն՝ Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Ուզբեկստանը: «ՀԱՊԿ-ն այսօր հանդես է գալիս որպես խաղաղության և կայունության պահպանման իրական գործոն տարածաշրջանային և միջազգային մակարդակում, և Հայաստանը՝ որպես ՀԱՊԿ-ի վստահելի գործընկերներից և դաշնակիցներից մեկը, ակտիվորեն մասնակցում է կազմակերպության գործունեությանը», - ասել է Աբրահամյանը Երևանում կայացած ՀԱՊԿ ԽՎ Խորհրդի նիստի ժամանակ:
Նա գոհունակությամբ նշել է, որ Հայաստանը վավերացրել է ՀԱՊԿ-ի շրջանակներում ստորագրված 31 միջազգային պայմանագրերից 30-ը:
«ՀԱՊԿ-ն այսօր պարզապես ռազմաքաղաքական կազմակերպություն չէ: Այն ունիվերսալ է և հաջողությամբ համագործակցում է այլ միջազգային կազմակերպությունների հետ, ամենատարբեր մակարդակներում պաշտպանում է գլոբալ անվտանգության հարցերի շուրջ սեփական անդամների համաձայնեցված դիրքորոշումները, սակայն ժամանակակից մարտահրավերներին և սպառնալիքներին ժամանակին, համատեղ արձագանքման կարևոր մեխանիզմ եմ համարում նաև միջազգային խորհրդարանական կազմակերպություններում՝ ԵԽԽՎ-ում և ԵԱՀԿ-ում մեր երկրների համար կարևոր հարցերի քվեարկության ժամանակ դիրքորոշումների համաձայնեցումը», - ասել է Աբրահամյանը:
Նրա խոսքերով՝ ՀԱՊԿ-ի ներուժի անշեղ ավելացման դեպքում բարձրանում է խորհրդարանական բաղկացուցիչի նշանակությունը, ինչի շնորհիվ իրականացվում է կազմակերպության գործունեության բոլոր ուղղությունների իրավանորմատիվային ապահովումը:
ՀՀ ԱԺ խոսնակը նշել է, որ Հայաստանն ակտիվորեն մասնակցում է ՀԱՊԿ ԽՎ-ի աշխատանքին, մասնավորապես, հաջող էր նախորդ տարի Երևանում պաշտպանության և անվտանգության հարցերին նվիրված ՀԱՊԿ ԽՎ արտագնա նիստի անցկացումը:
«Այսօր, երբ առավել ակնհայտ են դառնում նոր մարտահրավերները, հավաքական անվտանգության համակարգի ձևավորումը դառնում է ավելի հրատապ՝ ՀԱՊԿ անդամ-երկրների ազգային շահերի պաշտպանության համար», - ասել է Աբրահամյանը:
ՀԱՊԿ ԽՎ խորհրդի առաջին արտագնա նիստը գումարվել է երկուշաբթի ՀՀ խորհրդարանում: Նիստն անցկացրել է ՌԴ Պետական Դումայի նախագահ, ՀԱՊԿ ԽՎ նախագահ Բորիս Գռիզլովը: Նիստին մասնակցում են Հայաստանի, Բելառուսի, Ղազախստանի, Ռուսաստանի և Տաջիկստանի խորհրդարանական պատվիրակությունները:-0-
