«Հայաստանի 12 մայրաքաղաքներ» գրքի շնորհանդեսն է կայացել Երևանում

«Հայաստանի 12 մայրաքաղաքներ» (Les douze capitales d’Armnie) գրքի ֆրանսերեն և հայերեն լեզուներով շնորհանդեսն է  կայացել հինգշաբթի Երևանի Գիտությունների ազգային ակադեմիայի հնագիտության և ազգագրության կենտրոնում:

Ըստ Հնագիտության և ազգագրության ինստիտուտի տնօրեն Պավել Ավետիսյանի՝ գրքի հրատարակումը կարևոր իրադարձություն է՝ ելնելով մի շարք նկատառումներից: Մասնավորապես, գիրքը հրատարակվել է օտար լեզվով, պատրաստվել է Հայաստանի և Սփյուռքի պատմաբանների համատեղ ջանքերով և թուրք պատմաբանների պատասխանն է:

«Գրքում ներառված են Հայաստանի 12 թագավորական մայրաքաղաքները՝ Վանից մինչև Սիս, երկու հանրապետական մայրաքաղաքները՝ Երևանն ու Ստեփանակերտը, ինչպես նաև ծայրամասային մայրաքաղաքները»,- հայտնեց գրքի հեղինակներից և խմբագիրներից մեկը՝ պատմաբան Կլոդ Մութաֆյանը:

Պատմաբանն ընդգծեց, որ գիրքը նախատեսված է ոչ միայն գիտական շրջանակների համար, այլ նաև լայն հասարակության համար: Նա նշեց, որ գրքում բազմաթիվ լուսանկարներ և մանրանկարներ են ներառված:

Գրքի շնորհանդեսն ու նույնանուն լուսանկարչական ցուցահանդեսը կայացել է մարտի 24-ին Ֆրանսիայում (Մարսելում):
 
Շնորհանդեսն անցկացվել է Մարսելի մշակույթի և երիտասարդության հայկական տան, Ֆրանսիայի պատմական հուշարձանների կենտրոնի և «Կիլիկիա» ընկերության  աջակցության շնորհիվ: -0-