Ադրբեջանին ձեռնտու չէ ղարաբաղյան հակամարտության խաղաղ լուծումը. հայ քաղաքական գործիչ

Բաքուն ձեռնտու չի համարում ղարաբաղյան հակամարտության խաղաղ կարգավորումը, նույնիսկ եթե արդյունքը լինի Ադրբեջանի օգտին, հայտարարեց «Ազգային ինքնորոշում միավորում» կուսակցության նախագահ Պարույր Հայրիկյանը։

«Հակամարտության խաղաղ լուծումը կզրկի նրանց Հայաստանն ապակառուցողականության մեջ մեղադրելու և միջազգային տարբեր ատյաններում պարբերաբար հակահայկական փաստաթղթեր անցկացնելու հնարավորությունից, ինչպես օրինակ, Եվրահանձնաժողովի վերջին բանաձևը»,- ասաց կուսակցության ղեկավարը։

Ըստ նրա, մայիսի 20-ին Եվրահանձնաժողովի կողմից Հարավային Կովկասում հակամարտությունների կարգավորման վերաբերյալ ընդունված բանաձևը, որում կոչ է արվում «դուրս բերել հայկական զորքերն Ադրբեջանի «բռնազավթված տարածքներից», «ադրբեջանական նավթային լոբբինգի» արդյունք է»։

«Ադրբեջանը ձգտում է խնդրի ռազմական լուծման, որպեսզի ավելի մեծ տարածքներ գրավի, քան Լեռնային Ղարաբաղը։ Ինչպես նաև ցույց տալ ողջ աշխարհին, որ այս քայլն անխուսափելի է, քանի որ Հայաստանն իբր հրաժարվում է խաղաղ ճանապարհով վերադարձնել ադրբեջանական զավթած տարածքները»,- ասաց Հայրիկյանը։

Նա ընդգծեց, որ հայկական կողմը շատ թեթև է վերաբերում նման բանաձևերին՝ դրանք համարելով գործնական ուժ չունեցող դեկլարատիվ փաստաթղթեր։  

 «Նմանատիպ բանաձևերը հայկական կողմի համար պետք է ազդանշան լինեն, որպեսզի դադարենք սնվել պատրանքով և ավելի լուրջ հակահարված տանք Ադրբեջանի ձգտումներին»,- ասաց կուսակցության առաջնորդը։
   
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-