Միջազգային բեռնափոխադրումներ իրականացնող «ԱՊԱՎԵՆ» հայկական ընկերությունը, «ՏրանսԿոնտեյներ» ռուսական բեռնափոխադրման ԲԲԸ-ի հետ համատեղ, մշակել է Վրաստանի տարածքի միջով ռուս-հայկական երկաթուղային բեռնափոխադրումների մուլտիմոդալ սխեմա, չորեքշաբթի լրագրողներին հայտնեց «ԱՊԱՎԵՆ» ընկերության տնօրեն Գագիկ Աղաջանյանը:
«Մեծաքանակ փոխադրումների դեպքում, երբ բեռների քանակը կլինի այնքան, որ ավտոտրանսպորտի օգտագործումը աննպատակահարմար կլինի, մենք այլ մշակված սխեմա ունենք, որով շահագրգռված են նաև Վրացական երկաթուղիները և Հարավկովկասյան երկաթուղին: Վլադիկավկազի կոնտեյներային տերմինալից դեպի Թբիլիսի 200 կմ ճանապարհի մի փոքր հատվածում ավտոտրանսպորտ օգտագործելով՝ մենք կկապենք այս երկու երկաթուղիները»,- ասաց Աղաջանյանը:
Աղաջանյանը նշեց, որ այդ սխեման համաձայնեցվել է վրացական կողմի հետ, որը չափազանց շահագրգռված է իր երկաթուղու աշխատանքների ծավալի մեծացմամբ:
Մայիսի 24-ին Վրաստանի տարածքում տեղակայված «Վերին Լարս» հսկիչ անցակետը, որով հիմնական տարանցիկ բեռնափոխադրումներն են իրականացվում Հայաստանի և Ռուսաստանի միջև, գործարկվել է մեծ տարողունակությամբ բեռնատար մեքենաների համար. Անցակետը բաց կլինի մարտի 1-ից նոյեմբերի 1-ն ընկած ժամանակահատվածում, բաց կլինի ամեն օր` ժամը 06:00-ից մինչև 22:00, իսկ նոյեմբերի 1-ից մարտի 1-ը` ժամը 07:00-ից մինչև 19:00:
«ՏրանսԿոնտեյներ» ԲԲԸ-ն «ՌԵ» ԲԲԸ-ի դուստր ընկերություն է, որը գրանցվել է 2006թ.-ի մարտի 4-ին «ՌԵ» ԲԲԸ-ի մասնաճյուղի հիման վրա: Ընկերությունը տնտեսական գործունեությունը սկսել է 2006թ.-ի հուլիսի 1-ից:
«Հայկական երկաթուղի» ՓԲԸ-ի կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ-ի հարյուրտոկոսանոց դուստրը: ՀԿԵ»-ն իր բալանսում ընդունել ՀԵ շարժակազմը 2008թ. հունիսի մեկից՝ «Հայկական երկաթուղի» պետական ՓԲԸ-ն 30 տարի ժամկետով փոխանցելու, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—
