ԵՐԵՎԱՆ, 18 մայիսի. /Նովոստի-Արմենիա/. ՀՀ մշակույթի նախարար Հասմիկ Պողոսյանը ընդունել է ՀՀ-ում Իտալիայի արտակարգ և լիազոր դեսպան Բրունո Սկապինիին, «Դուչի հիմնադրամի» տնօրեն Պաոլո Դուչիին և հիմնադրամի մշակութային ծրագրերի պատասխանատու Մարիո Ավալիանոյին, ովքեր նաև ճանաչողական շրջայց են կատարում` ծանոթանալու Հայաստանի մշակութային ժառանգությանն ու ժամանակակից արվեստին:
Ինչպես տեղեկացնում են ՀՀ մշակույթի նախարարության մամուլի ծառայությունից, հանդիպման ընթացքում կողմերը անդրադարձել են Իտալիայի Սիենա քաղաքում «Դուչի» հիմնադրամի կողմից Հայաստանի մշակույթին նվիրված` «Հանդիպումներ եվրոպական մշակույթի հետ. Հայաստան» նախագծի իրականացման խնդիրներին: Հիմնադրամի առաքելություններից մեկը` նման խորագրի ներքո յուրաքանչյուր անգամ որևէ երկիր ներկայացնելն է և աշնանը ՀՀ մշակույթի նախարարության և հիմնադրամի ջանքերով Սիենայում կներկայացվի հայկական մշակույթը` կատարողական արվեստը, կերպարվեստը:
Նախարար Հասմիկ Պողոսյանը «Դուչի» հիմնադրամի տնօրենին առաջարկեց ծրագրին առավել հանգամանալից անդրադառնալու և այն ամբողջացնելու նպատակով` ճանաչողական այցի ավարտին կրկին անգամ աշխատանքային քննարկում անցկացնել, ինչին Պաոլո Դուչին սիրով համաձայնեց: Հանդիպման ավարտին կողմերը հայտնեցին այն համոզմունքը, որ Հայաստանի մշակույթին նվիրված Սիենայի նախագիծը անպայմանորեն կունենա շարունակականություն և հայ-իտալական մշակութային կապերի զարգացման ու ամրապնդման գործում կլինի լավագույն ներդրումներից մեկը: -0-
