Մեծ տարողունակության բեռնատարների համար «Վերին Լարս» հսկիչ-անցակետը կբացվի միայն հունիսի 1-ից

Բնակլիմայական պայմաններից ելնելով, մեծ տարողունակության բեռնատարների համար «Վերին Լարս» հսկիչ-անցակետը կբացվի միայն հունիսի 1-ից, հաղորդեցին  ՀՀ Տրանսպորտի և կապի նախարարությունից:

Վրաստանի և Ռուսաստանի սահմանի վրա գտնվող «Կազբեկի-Վերին Լարս» հսկիչ-անցակետը բացվել է մարտի 1-ին առավոտյան ժամը 06:00-ին: Ռուս-վրացական սահմանի ցամաքային հատվածի վրա գտնվող «Կազբեկի-Վերին Լարս» միակ պաշտոնական հսկիչ-անցակետը չէր գործում երեք տարի: Այն փակվել էր ռուսական կողմի որոշմամբ՝ ելնելով անցակետի վերանորոգման և ժամանակակից չափորոշիչներին համապատասխան զինելու անհրաժեշտությունից:

Բնակլիմայական պայմաններից ելնելով` մեծ տարողունակությամբ բեռնատար ավտոմեքենաների երթևեկությունը անցակետով հնարավոր կլինի իրականացնել հունիսի 1-ից:

Ներկայումս թույլատրված է միայն թեթև մարդատար ավտոմեքենաների, մինչև 30 ուղևոր տարողունակությամբ ավտոմեքենաների և մինչև 10 տոննա տարողունակությամբ բեռնատար ավտոմեքենաների երթևեկությունը:

Պահպանվում է նաև ձյան հոսքերի վտանգ, բացի այդ ավտոճանապարհի 12-13 կմ երկարությամբ հատվածը բարենպաստ կլիմայական պայմանների դեպքում պետք է վերանորոգվի: Անանցանելի են որոշ  թունելներ:-0-