ԵԽԽՎ ղեկավարի չափից ավելի ներգրավումը Հայաստանին վերաբերող տարբեր հարցերում անցանկալի է. թուրքագետ

ԵԽԽՎ ղեկավար Մևլյութ Չավուշօղլուի չափից ավելի ներգրավումը Հայաստանին կամ ղարաբաղյան հակամարտությանը վերաբերող տարբեր հարցերում անցանկալի է Երևանի համար, ասաց թուրքագետ Ռուբեն Մելքոնյանը։

Ինչպես նշեց թուրքագետը հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսում, Չավուշօղլուն Թուրքիայի գործող իշխող կուսակցության ակտիվ ներկայացուցիչ է և շնորհիվ իր կրթական ցենզի՝ որոշակի պաշտոն է զբաղեցնում եվրոպական կառույցներում։

«Սակայն միաժամանակ նա բարդություններ ունի եվրոպական և թուրքական արժեքների համադրման և ընտրության անհրաժեշտության հարցում, ինչպես ցույց է տալիս նրա քաղաքական դիրքորոշումը, նրա մեջ գերակշռում են զուտ թուրքական շահերը, և ոչ թե եվրոպական չափանիշները»,- ասաց Մելքոնյանը։

Տվյալ համատեքստում, ինչպես կարծում է փորձագետը, Չավուշօղլուի շահագրգռվածությունը հայ-թուրքական հարաբերություններով և ղարաբաղյան հակամարտությամբ չի կարելի պատահական համարել։

«Բնական է, որ արդյունքում նա չի կարող մեզ համար անկողմնակալ լինել, և հայկական կողմի համար անցանկալի է Չավուշօղլուի չափից ավելի  ներգարվվածությունն այդ գործընթացներում, քանի որ զբաղեցնելով նման բարձր պաշտոն՝ նա, բանականաբար, անպայման կփորձի գործընթացներին ավելի թուրքամետ երանգ հաղորդել և օգտագործել իր պաշտոնը հօգուտ Թուրքիայի»,- ասաց Մելքոնյանը։

Ինչպես կարծում է թուրքագետը, ԵԽԽՎ նախագահի մոտ միշտ կգերակշռի թուրքական իշխող կուսակցության ներկայացուցչի զգացումը, առավել ևս, որ նա ավելի շատ ընկալվում է որպես թուրքական քաղաքականության առաջնորդների մեկը, քան եվրոպացի քաղաքական գործիչ։

Եվրոպայի խորհրդի խորհրդարանական վեհաժողովի ղեկավար Մևլյութ Չավուշօղլուն երկօրյա այցով Հայաստանում է գտնվում։ Այցի շրջանակներում ԵԽԽՎ ղեկավարը հանդիպումներ է անցկացրել Հայաստանի բարձրագույն իշխանության հետ, նախատեսված են նաև հանդիպումներ խորհրդարանական խմբակցությունների անդամների, արտախորհրդարանական ընդդիմության ներկայացուցիչների հետ։ -0-