Արտաշատի «Արտֆուդ» պահածոների գործարանը մտադիր է իր նոր «Ամառ է» հյութերն արտահանել Ռուսաստանի շուկա, ասաց գործարանի գործադիր տնօրեն Վաչագան Կարապետյանը «Նովոստի-Արմենիա» գործակալությանը։
Արտաշատի «Արտֆուդ» պահածոների գործարանը երեքշաբթի գործարկեց արտադրվող խտանյութերի հիման վրա «Ամառ է» մրգային և բանջարեղենային հյութերի նոր արտադրամասը, որի նպատակով կատարված ներդրումները կազմում են 2,2 մլն եվրո։ Ներկայում գործարանն արտադրում է մրգային և բանջարեղենային 14 տեսակի հյութեր, իսկ մինչև տարեվերջ տեսականին կհասնի 18-ի։
«Արտադրանքը կարտահանվի, մասնավորապես, Ռուսաստանի, Ուկրաինայի և Վրաստանի շուկաներ»,- երեքշաբթի ասաց Կարապետյանը նոր արտադրամասի գործարկման արարողության ընթացքում։
Այս կապակցությամբ Հայաստանի Առևտրաարդյունաբերական պալատի (ԱԱՊ) նախագահ Մարտին Սարգսյանը պարզաբանեց, որ գործարանի նոր արտադրանքը համապատասխանում է եվրոպական չափորոշիչներին, այդ պատճառով այն կգտնի նոր շուկաներ։
«Հայաստանի ԱԱՊ միջոցով շուրջ 20 երկրում աշխատանք կտարվի տվյալ ապրանքի մարքեթինգի ապահովման ուղղությամբ այնպիսի երկրների շուկաներում, ինչպիսիք են ԱՄՆ-ն, Կանադան, Ռուսաստանը, Բելառուսը, Բուլղարիան և այլն»,- ասաց նա։
Գործարանը թողարկում է 61 անուն պահածոյացված արտադրանք, որը մինչև տարեվերջ կհասնի 64-ի: Գործարանը տարեկան արտահանում է մինչև 5 հազար տոննա վեց տեսակ խտանյութեր, որոնք հյութեր և կետչուպներ պատրաստելիս՝ օգտագործում են ինչպես տեղական, այնպես էլ արտասահմանյան ընկերությունները:-0-
