Երևանում տեղի է ունեցել այլ պետություններում բնակվող հայերի համար նախատեսված ձեռնարկի շնորհանդեսը
ԵՐԵՎԱՆ, 30 ապրիլի. /Նովոստի-Արմենիա/. Հինգշաբթի Երևանում տեղի է ունեցել այլ պետություններում բնակվող հայերի համար նախատեսված ձեռնարկի շնորհանդեսը: Ձեռնարկում ներկայացվում է ՀՀ տարածք մուտք գործելու, Հայաստանում գտնվելու և բնակվելու, Հայաստանից դուրս գալու, ՀՀ քաղաքացիության ձեռքբերման և Հայաստանում ՀՀ քաղաքացիների զինվորական ծառայության անցնելու կարգը:
Ձեռնարկը մշակվել է Աշխատանքի միջազգային կազմակերպության Աշխատանքային միգրացիայի տարածաշրջանային ծրագրի նախաձեռնությամբ և աջակցությամբ՝ ԵՄ-ի և Միացյալ Թագավորությամբ միջազգային զարգացման նախարարության ֆինանսավորմամբ:
Ինչպես շնորհանդեսի ժամանակ տեղեկացրել է Աշխատանքի միջազգային կազմակերպության գլխավոր տեխնիկական խորհրդական Իլին Բարուան, ձեռնարկը նախատեսված է արտասահմանում բնակվող հայերի համար և թույլ կտա նրանց ավելի հեշտ փոխգործակցել հայրենիքի հետ: Բարուան ասել է, որ ձեռնարկն անհրաժեշտության դեպքում կվերաթողարկվի:
ՀՀ սփյուռքի նախարար Հրանուշ Հակոբյանն իր հերթին նշել է, որ գրքի հիմնական նպատակը տեղեկատվական բազայի ստեղծումն է, որը թույլ կտա երկրի սահմաններից դուրս բնակվող հայերին ավելի շատ բան իմանալ սեփական հայրենիքի մասին, այդ թվում նաև՝ անհրաժեշտ տեղեկատվություն ստանալ հայկական օրենսդրության մասին:
«Մեծ թվով հայեր կան, ովքեր ցանկանում են այցելել հայրենիք, և նրանց, առաջին հերթին, հետաքրքրում է Հայաստանի օրենսդրությունը, քանի որ նրանք պետք է ապրեն և աշխատեն օրենսդրությանը համապատասխան», - ասել է Հակոբյանը:
Ձեռնարկը հրատարակվել է հայերեն և անգլերեն լեզուներով:-0-
