ՀՀ նախագահի վերջին այցերը հայկական արտաքին քաղաքականության ինտենսիվ զարգացումների վկայությունն են. պատգամավոր

ՀՀ նախագահ Սերժ Սարգսյանի վերջին արտերկրյա այցերը Վաշինգտոն և Մոսկվա վկայում են Հայաստանի արտաքին քաղաքականության ոլորտում ինտենսիվ և արդյունավետ զարգացումների մասին, չորեքշաբթի մամուլի ասուլիսի ժամանակ ասաց ԱԺ տնտեսական հարցերի մշտական հանձնաժողովի փոխնախագահ, «Բարգավաճ Հայաստան» կուսակցությունից ԱԺ պատգամավոր Վարդան Բոստանջյանը։

«Այդ զարգացումը հատկապես նկատելի է անցած տարիների Հայաստանի քաղաքականության համեմատ։ Ամեն դեպքում դա մեծ դեր է խաղում երկրի հեղինակության բարձրացման մեջ»,- ասաց Բոստանջյանը։

Պատգամավորն ավելացրեց, որ վաշինգտոնյան հանդիպումների ժամանակ Հայաստանը կրկին ելույթ ունեցավ որպես պետություն, որն ամուր ազգային դիրքորոշումներ ունի ինչպես Հայոց ցեղասպանության միջազգային ճանաչման, այնպես էլ հայ-թուրքական հարաբերությունների և Լեռնային Ղարաբաղի հակամարտության կարգավորման հարցում։

ՀՀ նախագահ Սերժ Սարգսյանը՝ ԱՄՆ նախագահ Բարաք Օբամայի հրավերով, ապրիլի 11-13-ը աշխատանքային այցով գտնվում  էր Վաշինգտոնում՝ գլոբալ միջուկային անվտանգության գագաթնաժողովին մասնակցելու համար։

Բոստանջյանն ասաց նաև, որ տնտեսական և էներգետիկ համագործակցության հարցերը, ինչպես արտաքին քաղաքական հարցերը, որոնք քննարկվել են Հայաստանի նախագահի՝ Մոսկվա կատարած մեկօրյա այցի ժամանակ, կրկին ցույց տվեցին, որ Ռուսաստանը համարվում է ուժեղ պետություններից մեկը, որի հետ համագործակցությունը միշտ հուսալի և արդյունավետ է եղել Հայաստանի համար։

Ապրիլի 20-ին Մոսկվա կատարած այցի շրջանակներում ՀՀ նախագահ Սերժ Սարգսյանը հանդիպել է ՌԴ ղեկավար Դմիտրի Մեդվեդևին։ -0-