ՀՀ ոստիկանությունը մի տղամարդու է ձերբակալել՝ «Օդնոկլասնիկի»-ով փող կորզելու համար

ԵՐԵՎԱՆ, 19 ապրիլի. /Նովոստի-Արմենիա/. Հայաստանի Ոստիկանությունը մի տղամարդու է ձերբակալել՝ «Օդնոկլասնիկի» սոցիալական ցանցի միջոցով աղջիկներից փող կորզելու համար։

Ինչպես երկուշաբթի «Նովոստի-Արմենիա» գործակալությանը հայտնեցին Հայաստանի Ոստիկանության մամուլի ծառայությունից,  մայրաքաղաքի բնակիչ Ա. Հակոբյանը ներկայում «Նուբարաշեն» քրեակատարողական հիմնարկի կալանավոր է. այնտեղ է հայտնվել խարդախություն կատարելու համար։

«Պարզվում է, որ նա մի շարք խարդախություններ է կատարել ինտերնետով։ «Օդնոկլասնիկի» կայքի միջոցով ծանոթացել է տարբեր աղջիկների հետ, հետո ինտերնետային ամենօրյա շփումներն այնքան են «մտերմացրել» նրանց, որ Հակոբյանն, իր վիրտուալ սիրուց ոգևորված, աղջիկներին խնդրել է լիցքավորել իր բջջային հեռախոսը»,- ասվում է հաղորդագրության մեջ։

Հաղորդագրության համաձայն, խարդախի պատճառաբանություններն ամեն անգամ այնքան «հիմնավոր» են եղել, որ դյուրահավատ աղջիկները, առանց երկար-բարակ մտածելու, օգնության ձեռք են մեկնել ինտերնետային ծանոթին։

Մի դեպքում, օրինակ, «ծանոթուհիներից» մեկը 20 հազար դրամ է փոխանցել Հակոբյանի բջջային հեռախոսին, մեկ այլ դեպքում երեսունհազարական դրամի լիցքավորում են կատարել երկու այլ աղջիկներ։

Ինտերնետային մեկ այլ ծանոթուհի էլ, ում Հակոբյանը ներկայացել էր որպես գործարար, «բավարարել էր» նրա հարյուրդոլարանոց ախորժակը։

Ա. Հակոբյանն իր այս «ինտերնետային գործունեության» վերաբերյալ արդեն խոստովանական ցուցմունքներ է տվել։

Ըստ ՀՀ ոստիկանության օպերատիվ հաղորդագրությունների ամփոփագրերի` 2010 թ. ապրիլի 1-ից 19-ն ընկած ժամանակահատվածում Հայաստանի Հանրապետության տարածքում արձանագրվել է խարդախության 49 դեպք, բացահայտվել է 48-ը: -0-