Երևան-Փարիզ-Երևան չվերթը չեղյալ է հայտարարվել Իսլանդիայում ժայթքած հրաբխայի մոխրի պատճառով

ԵՐԵՎԱՆ, 16 ապրիլի. /Նովոստի-Արմենիա/. Երևան-Փարիզ-Երևան չվերթը չեղյալ է հայտարարվել ուրբաթ Շառլ դը Գոլի անվան փարիզյան օդանավակայանի չգործելու պատճառով (օդանավակայանը չի գործում հրաբխի ժայթքման և հրաբխային մոխրի արտանետումների պատճառով), ուրբաթ «Նովոստի-Արմենիա» գործակալությանը հայտնեց «Արմավիա» ավիաընկերության մամուլի քարտուղար Նանա Ավետիսովան:

«Ուղևորները նախազգուշացված են եղել, և նրանց ցանկությամբ նախապես պատվիրված տոմսերով իրականացվել է վերատեղաբաշխում «Արմավիա»-ի առաջիկա չվերթերով»,- ասաց Ավետիսովան:

Իսլանդիայի  մայրաքաղաք Ռեյկյավիկից մոտ 200 կիլոմետր դեպի արևելք գտնվող Էյաֆյալայոքուլ (Eyjafjallajokull) հրաբխի ժայթքման հետևանքով մթնոլորտ է արտանետվել մոխրի հսկայական ամպ, որի մասնիկները վտանգ են ներկայացնում ավիացիոն շարժիչների տուրբինների համար և կարող են խնդիրներ առաջացնել՝ նստելով ինքնաթիռների թևերին: Դա հանգեցրեց Հյուսիսային Եվրոպայի զգալի տարածքի օդային տարածության փակմանը: -0-