ԵՐԵՎԱՆ, 13 ապրիլի. /Նովոստի-Արմենիա/. Իսրայելցի գիտնական, քիմիայի ոլորտում Նոբելյան մրցանակի դափնեկիր Ահարոն Չեխանովերը երեքշաբթի Երևանում արժանացել է ՀՀ կրթության և գիտության նախարարության ոսկե մեդալի:
«Շուրջ 50 տարվա ընթացքում սա նոբելյան դափնեկրի առաջին այցն է Երևան: Եվ առաջին անգամ իմ հրամանով օտարերկրացին արժանանում է մրցանակի», - հայտարարեց ՀՀ ԿԳ նախարար Արմեն Աշոտյանը գիտնականին նախարարության բարձրագույն գերատեսչական մեդալի հանձնման արարողության ժամանակ:
Աշոտյանը ընդգծեց Իսրայելի առաջատար դերը համաշխարհային գիտության մեջ և բարձր տեխնոլոգիաների ոլորտում և հույս հայտնեց, որ իսրայելցի գիտնականի այս ոչ պաշտոնական այցը Հայաստան կնպաստի գիտության և կրթության ոլորտներում երկու երկրների համագործակցությանը:
Չեխանովերն իր հերթին տեղեկացրեց, որ Երևանում է գտնվում Երևանի Մխիթար Հերացու անվան պետական բժշկական համալսարանի հրավերով բուհի 90-ամյակի կապակցությամբ:
«Ես շատ եմ կարդացել Հայաստանի մասին, սակայն առաջին անգամ եմ հնարավորություն ստացել այցելել այս երկիր: Ես բացառիկ հաճույք ստացա պարզապես Երևանի փողոցներով զբոսնելիս, մարդկանց հետ շփվելիս և հայկական ճաշատեսակներ փորձելիս: Մեր ժողովուրդները ընդհանուր շատ բան ունեն», - ասաց Չեխանովերը:
Հայտնի գիտնականը նշեց Իսրայելի առաջատար դերը բարձր տեխնոլոգիաների ոլորտում՝ հույս հայտնելով, որ Հայաստանը ևս կձգտի այդ ոլորտի զարգացմանը: Չեխանովերը ասաց նաև, որ Նոբելյան մրցանակ ստանալուց հետո շարունակում է գիտական գործունեությունը:
Խոսելով համամարդկային արժեքների մասին՝ գիտնականն ընդգծեց, որ չի ընդունում կրոնական ֆունդամենտալիզմն ու բռնությունը՝ լինի դա ընտանիքում, հասարակության մեջ կամ ազգերի միջև: «Ես փորձում եմ բացատրել, որ հենց խաղաղությունն է փրկելու մարդկությանը», - ասաց նա:
Ահարոն Չեխանովերը (ծնվել է 1947 թ.-ի հոկտեմբերի 1-ին Խայֆայում) իսրայելցի կենսաբան է, 2004 թ.-ին քիմիայի ոլորտում Նոբելյան մրցանակիր: Չեխանովերը 1982 թ.-ին Խայֆայում գտնվող Տեխնիոն տեխնոլոգիաների ինստիտուտում դոկտորական դիսերտացիայի է պաշտպանել:-0-
