Թուրք իրավապաշտպանները քննադատում են Ադրբեջանի ռազմատենչ հայտարարությունները

Մի խումբ իրավապաշտպաններ ռազմատենչ հայտարարությունների համար սուր քննադատության են ենթարկել Ադրբեջանին:

«Մենք՝ որպես իրավապաշտպաններ, քննադատում ենք բոլոր նրանց, ովքեր ռազմատենչ հայտարարություններ են անում: Եվ եթե Ադրբեջանը նման հայտարարություն է անում, մենք, իհարկե, քննադատում ենք նրան»,- ուրբաթ Երևանում հրավիրված մամուլի ասուլիսի ընթացքում ասաց Մարդու իրավունքների պաշտպանության թուրքական հիմնադրամի ղեկավար Յավուզ Օվենը:

Ադրբեջանի ղեկավարությունը ղարաբաղյան հակամարատության առնչությամբ պարբերաբար կտրուկ ռազմատենչ հայտարարություններ է անում Հայաստանին:

Նրա խոսքով, Ղարաբաղի շուրջ բոլոր տարածքային վեճերը հանգեցրել են նրան, որ պարբերաբար խախտվում են մարդու իրավունքները:

Օվենը նշեց, որ դա վերաբերում է նաև Ադրբեջանի և Թուրքիայի կողմից սպառազինության մեծացմանը:

«Մենք ցանկանում ենք, որ այդ միջոցները նպատակաուղղված օգտագործվեն մարդասիրական նպատակներով»,- ընդգծեց թուրք իրավապաշտպանը:

Թուրք իրավապաշտպանները, այդ թվում նաև հիմնադրամի ղեկավար Յավուզ Օվենը, Մարդու իրավունքների ասոցիացիայի նախագահը մասնակցում էին FIDH համաժողովին՝ «Արդարադատություն, նոր մարտահրավերներ» թեմայով, որն անցկացվեց Երևանում ապրիլի 6-8 –ը:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-