Հայաստանի խորհրդարանի դերը քաղաքական կյանքում ավելի էական կարող էր լինել. Կապինոս

ԵՐԵՎԱՆ, 6 ապրիլի. /Նովոստի-Արմենիա/. Հայաստանի խորհրդարանի դերը քաղաքական կյանքում ավելի էական կարող էր լինել, ասաց ԵԱՀԿ երևանյան գրասենյակի ղեկավար Սերգեյ Կապինոսը։

«Խորհրդարանում պետք է լուծվեն ժողովրդին հուզող ամենակարևոր հարցերը, քանի որ ըստ էության այնտեղ ընդգրկված են ժողովրդի ներկայացուցիչները»,- ասաց Կապինոսը Ռուս-Հայկական (Սլավոնական) համալսարանի ուսանողների և դասախոսների հետ հանդիպման ընթացքում։

Կապինոսը նշեց, որ 2005 թվականին Հայաստանի Օրենսդրությունում կատարած լրացումներն, այդ թվում, ուղղված են եղել խորհրդարանական ժողովրդավարության զարգացմանը՝ ընդգծելով, որ «այդ ուղղությամբ շարժվելու դաշտն առկա է»։

«Ես կողմ եմ, որպեսզի բոլոր կարևոր հարցերը լուծվեն խորհրդարանում, և այնտեղ համարժեք կերպով արտացոլվեն սոցիալական տարբեր շերտերի շահերը և հասարակության իրական սոցիալ-տնտեսական կառուցվածքը»,- ասաց նա՝ հավելելով, որ միաժամանակ խորհրդարանն իսկապես դառնում է քաղաքական որոշումների ընդունման կարևորագույն կենտրոն։

ԵԱՀԿ երևանյան գրասենյակի ղեկավարն ասաց, որ ընդդիմությունը խորհրդարանում թույլ է ներկայացված, «իսկ ցանկացած ժողովրդավարական պետություն պետք է շահագրգռված լինի ուժեղ ընդդիմության առկայությամբ»։

«Միայն ուժեղ ընդդիմությունը հնարավորություն կտա ձևավորել մրցունակ միջավայր, որն արագացնում է հասարակության զարգացումը»,- ընդգծեց Կապինոսը։ -0-